અહીં શાળાઓમાં એક મોટું કૌભાંડ સામે આવ્યું, 2400 વર્ગખંડોના બાંધકામમાં નાણાની ઉચાપતનો મામલે વિજિલન્સ ડિરેક્ટોરેટની તપાસની ભલામણ

દિલ્હી મ્યુનિસિપલ કોર્પોરેશનની ચૂંટણી પહેલા આમ આદમી પાર્ટીની મુશ્કેલીઓનો અંત આવે તેમ લાગતું નથી. જેલમાં મસાજ અને વીવીઆઈપી ટ્રીટમેન્ટને લઈને હોબાળો હજુ પૂરો થયો નથી ત્યાં જ દિલ્હીની શાળાઓમાં એક મોટું કૌભાંડ સામે આવ્યું છે. સત્યેન્દ્ર જૈન બાદ હવે દિલ્હીના શિક્ષણ મંત્રી મનીષ સિસોદિયાની મુશ્કેલીઓ વધી શકે છે. વિજિલન્સની તપાસમાં 1300 કરોડનું કૌભાંડ બહાર આવ્યું છે. એવો દાવો કરવામાં આવ્યો છે કે 2400 વર્ગખંડોના બાંધકામમાં નાણાંની ઉચાપત કરવામાં આવી હતી. વિજિલન્સ ડિરેક્ટોરેટે આ કૌભાંડની તપાસની ભલામણ કરી છે.

શિક્ષણ વિભાગ અને PWDના અધિકારીઓ સામે તપાસની ભલામણ કરવામાં આવી છે. 5 શાળાઓમાં 42 કરોડના કામો ટેન્ડર વગર થયા હોવાનું તપાસમાં બહાર આવ્યું છે. શાળાઓમાં 116 ટોયલેટ બ્લોકની જરૂરિયાત હતી, પરંતુ 1214 ટોયલેટ બ્લોક બનાવવામાં આવ્યા હતા. સત્તાવાર સૂત્રોએ જણાવ્યું કે દિલ્હી સરકારના વિજિલન્સ ડિરેક્ટોરેટે મુખ્ય સચિવને તપાસની ભલામણ કરતો રિપોર્ટ સોંપ્યો છે.

સેન્ટ્રલ વિજિલન્સ કમિશન (CVC) એ 17 ફેબ્રુઆરી, 2020 ના રોજ એક અહેવાલમાં, જાહેર બાંધકામ વિભાગ (PWD) દ્વારા દિલ્હીની સરકારી શાળાઓમાં 2,400 થી વધુ વર્ગખંડોના નિર્માણમાં “ગંભીર અનિયમિતતાઓ” પર પ્રકાશ પાડ્યો હતો. તકેદારી આયોગે ફેબ્રુઆરી 2020માં દિલ્હી સરકારના સતર્કતા નિદેશાલયને આ મામલે તેની ટિપ્પણીઓ માંગીને રિપોર્ટ મોકલ્યો હતો.

એક સૂત્રએ જણાવ્યું હતું કે, ડિરેક્ટોરેટે, જોકે, અઢી વર્ષ સુધી રિપોર્ટને છુપાવી રાખ્યો હતો, જ્યાં સુધી એલજી વીકે સક્સેનાએ આ વર્ષે ઓગસ્ટમાં મુખ્ય સચિવને તેના વિલંબની તપાસ કરવા અને રિપોર્ટ સબમિટ કરવા કહ્યું હતું. તેમણે કહ્યું કે નિર્દેશાલયે શિક્ષણ વિભાગ અને PWDના સંબંધિત અધિકારીઓની “જવાબદારી નક્કી કરવા”ની પણ ભલામણ કરી છે, જેઓ લગભગ રૂ. 1,300 કરોડના “કૌભાંડ”માં સામેલ હતા.