કાબુલમાં નાસભાગ મચી, વિમાનમાં લટકીને દેશ છોડી રહેલા ત્રણ લોકો પટકાયા, જુઓ વીડિયો

તાલિબાનોએ અફઘાનિસ્તાન પર કબજો કર્યા બાદ લોકો દેશ છોડવા માટે પોતાનો જીવ જોખમમાં મુકી રહ્યા છે. સોમવારે હવામાં ઉડતા વિમાનમાંથી પડતા 3 લોકોના મોત થયા હતા. તે એક લશ્કરી વિમાન હતું અને માહિતી અનુસાર, લોકો વિમાનની બોડી પર લટકીને મુસાફરી કરી રહ્યા હતા. કાબુલ શહેરના આકાશમાં ઉડતા વિમાનમાંથી લોકો પડતા હોવાના વીડિયો પણ સામે આવ્યા છે. એક પછી એક લોકો નીચે પડતા જોવા મળે છે. સ્થાનિક લોકોએ જણાવ્યું કે આ લોકો દેશ છોડવા માટે લશ્કરી વિમાનના ટાયર વચ્ચે ઉભા હતા. કાબુલ એરપોર્ટ પરથી ટેક ઓફ કર્યા બાદ, વિમાન હવામાં પહોંચતાની સાથે જ આ લોકો એક પછી એક નીચે પડવા લાગ્યા. શહેરના લોકોએ તેમને પડતા જોયા, પરંતુ હજુ સુધી તેમની ઓળખ થઈ શકી નથી.
અફઘાનિસ્તાનમાં તાલિબાનોના કબજા બાદ કાબુલ એરપોર્ટ પર ભારે ભીડ જોવા મળી રહી છે. એરપોર્ટ હાલમાં યુએસ સૈનિકોના નિયંત્રણ હેઠળ છે. રોઇટર્સ અનુસાર, એરપોર્ટ પર ગોળીબારમાં પાંચ લોકોના મોત થયા છે અને અન્ય ઘણા લોકો ઘાયલ થયા છે. વીડિયોમાં એરપોર્ટ પર મૃતદેહો જોવા મળી રહ્યા છે.

દરમિયાન કાબુલમાં ઘણા વિસ્તારોમાં લૂંટના અહેવાલો છે. સત્તાવાર નંબર પ્લેટ વાળા વાહનોની લૂંટ થઈ રહી છે. કેટલાક લોકોએ એવો દાવો પણ કર્યો છે કે તેમના અંગત વાહનો છીનવી લેવામાં આવ્યા હતા. એરપોર્ટ નજીક રહેણાંક વસાહતમાં ફાયરિંગ થયું હતું. સરકારી એજન્સીઓની કચેરીઓમાં લૂંટફાટ થઈ છે. તાલિબાનનું કહેવું છે કે અસ્તવ્યસ્ત તત્વોએ તાલિબાનના નામે સંવેદનશીલ દસ્તાવેજો લૂંટી લીધા છે અને સળગાવી દીધા છે. અહીં અમેરિકાએ કહ્યું છે કે તે તેના 6,000 સૈનિકોને એરપોર્ટ પર તૈનાત કરશે, જેથી નાગરિકોને સલામત રીતે બહાર કાઢી શકાય. અત્યારે કાબુલ એરપોર્ટ પર નાસભાગ જેવી સ્થિતિ છે. દેશ છોડવા માટે હજારો લોકો ત્યાં ભેગા થયા છે. ઘણા એવા પણ છે જે કોઈ પણ સામાન લીધા વગર એરપોર્ટ પર પહોંચી ગયા છે.