NASAની વધુ એક સિદ્ધી, રૉવરે મોકલ્યા મંગળ ગ્રહના વીડિયો

અંતરિક્ષ ક્ષેત્રમાં સંશોધનો કરવામાં સદાય અગ્રેસર રહેલી અમેરિકન સ્પેસ એજન્સી નાસાએ ફરી એક સિદ્ધી મેળવી છે. તેણે મોકલેલા રોવરે મંગળ ગ્રહનું પહેલું રેકૉર્ડિંગ સંશોધકોને મોકલ્યું છે. જો કે, આ વીડિયો માત્ર 10 સેકન્ડનો છે. જેમાં મંગળગ્રહ પર થતી ગતિવિધિનો ઘણો ઓછો અવાજ સાંભળવા મળ્યો છે. વળી, નાસાએ આ વીડિયો કોઈ પણ ખચકાટ વગર દુનિયા સાથે શેર પણ કર્યો છે. નાસાએ મેળવેલા આ ઑડિયો અને વીડિયોથી લાલ ગ્રહ વિશે માનવજગતને વધુ વિગતો મળશે. રોવરે મોકલેલા વીડિયોમાં મંગળગ્રહ પર ઉતરાણ અને ત્યારબાદની સમગ્ર પ્રક્રિયાને નિહાળી નાસાના સંશોધકો તથા કર્મચારીઓમાં ખુશીનો પાર રહ્યો ન હતો. જે બાદ નાસાએ દાવો કરતા કહ્યું હતુ કે, માર્સ પર લેન્ડિંગનો વિડીયો અને તસવીરો લેવામાં આવી છે. આ ઘટના ઈતિહાસમાં પહેલીવખત બની છે.
મંગળ ગ્રહ પર ઉતરાણ વેળાની 23000 તસવીરો રોવરમાં મુકાયેલા કેમેરાએ ખેંચી છે. રોવરે પેરાશૂટની મદદથી મંગળ ગ્રહની લાલ ધરતી પર ઉતરાણ કર્યું હતુ. આ વેળાની એક-એક ક્ષણ કેમેરામાં કેદ થઈ છે. નાસાએ 2 મહિના પહેલા જ મોકલેલું યાન મંગળ પર પહોંચ્યું હતુ. જે બાદ તેના રોવરે ત્યાં ઉતરાણ કર્યું હતુ. રોવરમાં નાસાએ પહેલાથી જ અત્યાધુનિક કેમેરા ફીટ કરેલા છે. તેથી કેમેરાએ પહેલીવાર દુનિયાને બતાવ્યું છે કે, મંગળ ગ્રહ ઉપર કઈ રીતે લેન્ડિંગ થાય છે. નાસાએ મેળવેલો બીજી વિડીયો 3 મિનિટ 25 સેકન્ડનો છે. જેમાં ત્રણ ફ્રેમ જોઈ શકાય છે. જેમાં રોવરે મંગળપર કરેલી ઉતરાણ પ્રક્રિયાને સ્પષ્ટ રીતે જોઈ શકાય છે. મંગળ ગ્રહની સપાટી ઉબડ-ખાબડ છે. સપાટી પર વચ્ચે-વચ્ચે મોટા ખાડા પણ જોવા મળી રહ્યા છે. વીડિયોમાં હીટ શીલ્ડ અને પેરાશૂટને પણ જોઈ શકાય છે. 4 દિવસ પહેલા એટલે કે 19 ફેબ્રુઆરીએ પર્સિવરેંસ રોવર ધરતીથી ટેકઑફ કર્યાના સાત મહિના બાદ સફળતાપૂર્વક મંગળ ગ્રહ પર લેન્ડ થયું હતુ. 25 કેમેરાવાળા પર્સિવરેંસ રોવરે અલગ-અલગ એન્ગલોથી મંગળની લાલ કાંકરીવાળી ધરતીના ફોટા પાડ્યા હતા. મંગળ ગ્રહની સપાટીની આટલી નજીકનો વિડીયો પહેલીવાર ધરતી સુધી પહોંચ્યો છે. રોવરમાં એક હેલીકોપ્ટર છે, જેને ઈન્જેન્યુટી નામ અપાયું છે. આ રોવર મંગળ ગ્રહ પર ઉતર્યા બાદ નાસાના વર્ષ 2006માં મોકલવામાં આવેલા ઑર્બિરટરની મદદથી પોતાનો ડેટા અને તસવીરો મોકલી રહ્યું છે.