થાઈલેન્ડ ઓપનમાં અશ્વની- સાત્વિકરાજની જોડી સેમી ફાઈનલમાં પહોંચ્યા

થાઇલેન્ડ ઓપન સુપર ૧૦૦૦ ટુર્નામેન્ટમાં ક્વાર્ટર ફાઇનલમાં ભારતની પી.વી. સિંધુ અને સમીર વર્માને પછડાટ ખાવાની નોબત આવી હતી. બીજી તરફ સિંગલ્સમાં સમીર વર્માના અભિયાનનો ડેન્માર્કના વિશ્વના ત્રીજા ક્રમાંકિત ખેલાડી ૧૩-૨૧, ૨૧-૧૯, ૨૦-૨૨થી પરાજય થતાં તેને નિરાશ થવુ પડ્યું છે. જ્યારે ઓલિમ્પિક સિલ્વર મેડલિસ્ટ પી.વી.સિંધુનો ક્વાર્ટર ફાઇનલમાં થાઇલેન્ડના રેચનોક ઇન્થેનોન સામે સીધા સેટોમાં ૨૧-૧૩, ૨૧-૯થી પરાજય થયો હતો. જયારે અશ્વની પોનપ્પા અને સાત્વિકરાજની જોડીએ શાનદાર વિજય મેળવીને મિકસ્ડ ડબલ્સની સેમી ફાઇનલમાં પ્રવેશ કરી લીધો હતો. પાંચમી ક્રમાંકિત જોડી અને વિશ્વના છ નંબરના ખેલાડી પેંગ સૂન ચાન અને મલેશિયાના લિઉ યિંગ ગોહને સાત્વિક અને અશ્વિનીએ ૧૮-૨૧, ૨૪-૨૨ અને ૨૨-૨૦થી શિકસ્ત આપી હતી. એક કલાક અને પંદર મિનિટ સુધી ચાલેલા રોમાંચક મુકાબલામાં અશ્વની-સાત્વિકરાજે ખેલનું ઉત્તમ પ્રદર્શન કર્યું હતુ. હવે આ બંનેનો સામનો થાઇલેન્ડના દેચાપોલ-સપસિરીની બનેલી જોડી સામે થશે.