મહારાષ્ટ્રના અહમદનગર જિલ્લામાં એક સરઘસ દરમિયાન મુગલ શાસક ઔરંગઝેબના પોસ્ટર લહેરાવવાનો મામલો સામે આવ્યો છે. આ મામલામાં સ્થાનિક પોલીસે ચાર લોકો સામે ગુનો નોંધ્યો છે. હાલમાં આ ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે. ભિંગાર કેમ્પના એક પોલીસ અધિકારીના જણાવ્યા અનુસાર, રવિવારે સવારે 9 વાગ્યે ફકીરવાડા વિસ્તારમાં સરઘસ કાઢવામાં આવ્યું હતું. આ દરમિયાન ચાર લોકોએ શોભાયાત્રામાં સંગીત અને નૃત્યની વચ્ચે ઔરંગઝેબના પોસ્ટર લહેરાવ્યા હતા. આ ચાર લોકો સામે ભારતીય દંડ સંહિતા હેઠળ એક સમુદાય દ્વારા બીજા સમુદાયને ઉશ્કેરવા, ધાર્મિક લાગણીઓને ઠેસ પહોંચાડવાના હેતુથી કરવામાં આવેલા કૃત્યો અને અન્ય કલમો હેઠળ કેસ નોંધવામાં આવ્યો છે.
આ પહેલા સોમવારે મહારાષ્ટ્રના નાયબ મુખ્યમંત્રી દેવેન્દ્ર ફડણવીસે કહ્યું હતું કે આવા કૃત્યો સહન કરવામાં આવશે નહીં.
તેમણે કહ્યું, ‘જો કોઈ ઔરંગઝેબનું પોસ્ટર લહેરાવશે તો તેને સહન કરવામાં આવશે નહીં. આ દેશ અને રાજ્યમાં આપણા પૂજનીય દેવતાઓ છત્રપતિ શિવાજી મહારાજ અને છત્રપતિ સંભાજી મહારાજ છે.’
બીજી બાજુ, NCPના મહારાષ્ટ્ર એકમના વડા જયંત પાટીલે કહ્યું કે રાજ્ય સરકારે કાયદો અને વ્યવસ્થા જાળવવા માટે યોગ્ય પગલાં લેવા જોઈએ. શિવસેનાના (ઉદ્ધવ બાળાસાહેબ ઠાકરે) એમએલસી અંબાદાસ દાનવેએ આક્ષેપ કર્યો હતો કે જ્યારે આવી ઘટનાઓ સામે આવે છે ત્યારે સરકાર કડક કાર્યવાહીના ઊંચા દાવા કરે છે પરંતુ કંઈ કરતી નથી.
