ભારતમાં ઓલા દ્વારા ઇ-સ્કૂટરનું બુકિંગ, કંપનીએ તમીલનાડુમાં પ્લાન્ટ સ્થાપ્યો

શનિવારથી ઓલા કંપની દ્વારા આખરે તેના ઇલેક્ટ્રિક સ્કૂટરનું બુકિંગ શરૂ કરાયું છે. એટલે ભારતના માર્કેટમાં ટૂંક સમયમાં જ આ કંપનીના સ્કુટર દેખાશે અને રસ્તાઓ પર દોડવા માંડશે. ઓલા કંપનીના CEO ભાવિશ અગ્રવાલે સોશિયલ મીડિયા પર આ અંગે માહિતી શેર કરતા જણાવ્યું છે કે, વિશ્વની સૌથી મોટી ટૂ-વ્હીલર મેન્યુફેક્ચરિંગ સુવિધા બનાવવા માટે કંપનીએ 2400 કરોડનું રોકાણ કર્યું છે. ઓલા ઇલેક્ટ્રિક કંપનીએ તમિલનાડુના કૃષ્નાગિરી જિલ્લામાં વિશ્વનો સૌથી મોટો ઇલેક્ટ્રિક ટૂ-વ્હીલર પ્લાન્ટ સ્થાપ્યો છે. જ્યાં ઓલા લોકલ માગ સિવાય એશિયા, યુરોપ અને દક્ષિણ અમેરિકાના બજારોને સપ્લાય કરવા માટે વાર્ષિક 20 લાખ ઇલેક્ટ્રિક સ્કૂટર્સ બનાવવાનું લક્ષ્ય રાખે છે.
ભારતમાં પણ ગ્રાહકોને ઈ સ્કૂટરનો લાભ મળશે. ઓલા પહેલા વર્ષે જ 10 લાખ ઇ-સ્કૂટર્સ વેચવાની યોજના બનાવી રહી છે. આ માટે ગ્રાહક olaelectric.com પર જઇને બુકીંગ કરાવી શકે તેવી સુવિધા ઉપલબ્ધ કરી દેવાઈ છે. જો કે, આ સૌપ્રથમ બુકિંગ માટે 499 રૂપિયા તે ગ્રાહકે ચૂકવવા પડશે. ઓલાના આ ઇ-સ્કૂટરની કિંમત હાલના અથર એનર્જી (રૂ.1.39 લાખ) અને બજાજ ઓટોના ચેતક (રૂ. 1 લાખ) જેવી ઇ-બાઇકને જબરદસ્ત ટક્કર આપશે. કારણ કે, કંપની ભારતમાં ઇલેક્ટ્રિક ટૂ-વ્હીલર સેગમેન્ટમાં અન્ય હરિફ કંપનીઓને ટક્કર આપવા માંગે છે.
આ પહેલાં 2 જુલાઇએ જ ભાવિશ અગ્રવાલે ઇલેક્ટ્રિક સ્કૂટર ચલાવતો તેનો વીડિયો ટીઝર રજૂ કર્યો હતો. 56 સેકંડના આ ટીઝરમાં કંપનીએ ઇ-સ્કૂટરનાં ફીચર્સ અને પર્ફોર્મન્સ બતાવ્યાં હતા. કંપની ઇલેક્ટ્રિક વાહન ગ્રાહકોને દેશભરમાં ચાર્જ કરવામાં કોઈ તકલીફ ન પડે તે માટે એક મોટું ઇલેક્ટ્રિક ચાર્જિંગ નેટવર્ક સ્થાપવાની દીશામાં પણ વિચારણા કરી રહી છે. જેમાં પ્રથમ વર્ષે ઓલા 100 શહેરોમાં 5000 ચાર્જિંગ પોઇન્ટ સેટ કરશે. આ ઉપરાંત તેમાં મોટી બૂટ સ્પેસ આપવામાં આવી છે.
કંપનીનો દાવો છે કે, સ્કૂટરને ફાસ્ટ ચાર્જરથી 18 મિનિટમાં 50% ચાર્જ થઈ જશે. તેમાં 75 કિમીની રેન્જ મળશે. આ સાથે, આ ઇલેક્ટ્રિક સ્કૂટરમાં સ્માર્ટફોન કનેક્ટિવિટી ફીચર પણ મળશે, જે ઓલા ઇલેક્ટ્રિક એપ્લિકેશન દ્વારા ચાર્જિંગ સ્ટેટસ વિશે રિયલ-ટાઇમ માહિતી આપવામાં મદદ કરશે. ઓલાનું આ ઇલેક્ટ્રિક સ્કૂટર સિંગલ ચાર્જમાં 150 કિમી દોડશે તેવો દાવો છે. ઉપરાંત તેની ટોપ સ્પીડ 90 કિમી પ્રતિ કલાકની હશે. આ ઇલેક્ટ્રિક સ્કૂટર હોમ ચાર્જર સાથે આવશે. રેગ્યુલર વોલ સોકેટથી આ સ્કૂટર ચાર્જ કરી શકશે.