અમદાવાદના આ ક્રિકેટ સ્ટેડિયમનું નામ બદલવા કોંગ્રેસ આપ્યું પ્રજાને વચન, જાણો કોંગ્રેસે બીજા ક્યા કર્યા વાયદાઓ

ગુજરાત વિધાનસભાની ચૂંટણીના પ્રથમ તબક્કા માટે નામાંકન પ્રક્રિયાની વચ્ચે રાજકીય પક્ષો દ્વારા મતદારોને પોતાના પક્ષમાં લેવાનો સંઘર્ષ તેજ થતો જોવા મળી રહ્યો છે. નેતાઓ પ્રજાલક્ષી વચનો આપી રહ્યા છે, પ્રજાના પ્રશ્નોના નિરાકરણ માટે આશ્વાસનો આપવામાં આવી રહ્યા છે, ત્યારે હવે કોંગ્રેસે પણ પોતાનો ચૂંટણી ઢંઢેરો બહાર પાડ્યો છે.

રાજસ્થાનના મુખ્યમંત્રી અશોક ગેહલોતે શનિવારે આયોજિત એક કાર્યક્રમમાં ગુજરાત ચૂંટણી માટે કોંગ્રેસનો ઢંઢેરો ‘જન ઘોષણાપત્ર 2022’ બહાર પાડ્યો હતો. કોંગ્રેસે પોતાના ઘોષણાપત્રમાં યુવાનો, મહિલાઓ, ખેડૂતો માટે લોકપ્રિય વચનો આપ્યા છે. કોંગ્રેસ પક્ષ દ્વારા જાહેર કરવામાં આવેલા ઢંઢેરામાં દરેક ગુજરાતીને 10 લાખ રૂપિયા સુધીની મફત સારવાર અને મફત દવાઓની સાથે 300 યુનિટ મફત વીજળી, બાકી વીજળીના બિલો માફ કરવાનું વચન આપવામાં આવ્યું છે.

કોંગ્રેસે સત્તામાં આવ્યા બાદ નરેન્દ્ર મોદી સ્ટેડિયમનું નામ બદલીને સરદાર પટેલ સ્ટેડિયમ રાખવાનું વચન આપ્યું છે. પાર્ટી તરફથી એમ પણ કહેવામાં આવ્યું છે કે જો કોંગ્રેસ સત્તામાં આવશે તો પ્રથમ કેબિનેટ મીટિંગથી જ તેને સરકારનો સત્તાવાર દસ્તાવેજ બનાવીને કામ કરવામાં આવશે. સત્તામાં આવ્યા બાદ કોંગ્રેસે 10 લાખ યુવાનોને સરકારી નોકરી આપવાનું વચન આપ્યું છે અને કહ્યું છે કે મહિલાઓને 50 ટકા અનામત આપવામાં આવશે. કોંગ્રેસ પાર્ટીએ જાહેર કરેલા જાહેર ઢંઢેરામાં સરકારી નોકરીઓમાં કોન્ટ્રાક્ટ અને આઉટસોર્સિંગની પ્રણાલી ખતમ કરવાનું, બેરોજગારોને દર મહિને 3000 રૂપિયાનું બેરોજગારી ભથ્થું આપવાનું પણ વચન આપ્યું છે.

ગુજરાતમાં 27 વર્ષથી સત્તાથી દૂર રહેલી કોંગ્રેસે દૂધ ઉત્પાદકોને લિટર દીઠ 5 રૂપિયા અને ગેસ સિલિન્ડર 500 રૂપિયામાં આપવાનું વચન આપ્યું છે. કોંગ્રેસે છોકરીઓ માટે KG થી PG સુધી મફત શિક્ષણનું વચન આપ્યું છે અને કહ્યું છે કે જો પાર્ટી સત્તામાં આવશે તો 3000 અંગ્રેજી માધ્યમની સરકારી શાળાઓ ખોલવામાં આવશે.