આજે લોન્ચ થશે ડીઆરડીઓની કોરોનાની દવા, ભારતને વધુ એક દવા મળશે

કોરોના વાઇરસના સંક્રમણ સામે ભારતને વધુ એક દવા મળશે. ડીઆરડીઓ એટલે કે ડિફેન્સ રિસર્ચ એન્ડ ડેવલપમેન્ટ ઓર્ગેનાઇઝેશને વિકસાવેલી કોરોનાની દવા 2 ડીજીનો પહેલો જથ્થો આજે લોન્ચ થશે. સરંક્ષણ મંત્રી રાજનાથ સિંહ અને આરોગ્ય મંત્રી ડૉ. હર્ષવર્ધને આજે એ દવા લોન્ચ કરશે. આ દવા લોન્ચ થાય તેના એક બે દિવસ બાદ દવા લોકોને મળતી થઇ જશે. સૂત્રોના જણાવ્યા પ્રમાણે હૈદરાબાદની ડૉક્ટર રેડ્ડીની લેબમાં આ દવાના 10 હજાર ડોઝ તૈયાર થઇ ગયા છે. સરંક્ષણ મંત્રાલયે આ મહિનાની શરૂઆતમાં જણાવ્યું હતું કે, કોવિડ 19ના મધ્યમ તથા ગંભીર લક્ષણવાળા દર્દીઓ પર આ દવાનો ઇમરજન્સી ઉપયોગ કરવા માટે ડ્રગ કંટ્રોલર જનરલ ઓફ ઇન્ડિયાએ મંજુરી આપી દીધી છે. યાદ રહે કે કોરોનાના નવા કેસોમાં સતત થઇ રહેલા વધારાને જોતાં ડીસીજીઆઇએ આ દવાને ઇમરજન્સી ઉપયોગ માટે છુટ આપી છે. હવે ડીઆરડીઓના મુખ્યાલયમાં આજે એક કાર્યક્રમમાં બંને કેન્દ્રિય મંત્રીઓએ આ દવાના પહેલા જથ્થાને લોન્ચ કરી હતી.
સરંક્ષણ મંત્રાલયનું કહેવું છે કે કોવિડ 19ની બીજી લહેરને કારણે મોટી સંખ્યામાં દર્દીઓને ઓક્સિજન અને હોસ્પિટલમાં દાખલ કરવાની જરૂર પડી રહી છે. આ દવા કોરોનાના સામાન્યથી ગંભીર દર્દીઓને આપી શકાય છે. 2 ડી ઓક્સિડી ગ્લૂકોઝ દવા દર્દીઓને ઝડપથી ઠીક કરવામાં મદદ કરે છે અને ઓક્સિજન પર નિર્ભરતા ઓછી કરશે. કોરોનાની સામેના જંગમાં ડીઆરડીઓની નવી દવા આશાનું કિરણ લઇને આવી છે. આ દવાનું નામ 2 ડી ઓક્સિ ડી ગ્લૂકોઝ ( 2 ડીજી ) છે. ડીઆરડીઓની આ દવા એવા સમયે આવી છે કે જ્યારે કોરોનાની ત્રીજી લહેર આવશે એવી ચર્ચાઓ ચાલી રહી છે. હાલમાં જ બીજી લહેર વખતે દેશભરમાં ઓક્સિજનની અછત વર્તાઇ હતી. બીજી લહેરમાં વિક્રમસર્જક મોત થયા છે અને સ્વાસ્થ્ય સંસાધનો ઉપર ભારે દબાણ આવ્યું હતું. ડીઆરડીઓની આ દવા પાવડરરૂપે છે. તે પેકેટમાં આવે છે અને તેને પાણીમાં નાંખીને પી જવાની હોય છે.