કોરોનાના કહેર વચ્ચે પણ ચીન અવળચંડાઇ છોડતું નથી, આ દેશના હવાઇ ક્ષેત્રમાં મોકલ્યા 71 વિમાન

રવિવારે ચીને તાઈવાનના સમગ્ર એરસ્પેસને ઘેરીને લશ્કરી દાવપેચ હાથ ધર્યા હતા. ચીને આ પાવર શો ‘સ્ટ્રાઈક ડ્રીલ’ના રૂપમાં કર્યો હતો, જેના હેઠળ તેની વાયુસેના અને સેનાએ કોઈપણ લક્ષ્યને હિટ કરવાની પોતાની ક્ષમતા દર્શાવી હતી. અલ જઝીરાના રિપોર્ટ અનુસાર ચીને તાઈવાનને ચેતવણી આપવા માટે 47 એરક્રાફ્ટ મોકલ્યા છે. પાછલા મહિનાઓમાં ચીન દ્વારા તાઈવાનના એર ડિફેન્સ ઝોનનું આ સૌથી મોટું ઉલ્લંઘન હતું. એવું કહેવામાં આવ્યું છે કે આ સમયગાળા દરમિયાન ચીને તેના J-10, J-11, J-16 અને સુખોઈ-30 ફાઈટર જેટ સહિત 42 ફાઈટર એરક્રાફ્ટ મોકલ્યા, જ્યારે બે Y-8 મેરીટાઇમ પેટ્રોલ એરક્રાફ્ટ અને એક KJ-500 અર્લી વોર્નિંગ એરક્રાફ્ટ પણ આ ઝુંબેશનો ભાગ હતા. આ સિવાય ચીન તરફથી CH-4 અને WZ-7 મિલિટરી ડ્રોન પણ મોકલવામાં આવ્યા હતા. તાઈવાન સ્ટ્રેટ (ચીન અને તાઈવાન વચ્ચેનો સમુદ્ર)માં કુલ 71 ચીની વિમાન જોવા મળ્યા હતા.

અલ જઝીરાના રિપોર્ટ અનુસાર ચીનના ઈસ્ટર્ન થિયેટર કમાન્ડે આ પેંતરા દ્વારા અમેરિકા અને અન્ય પશ્ચિમી દેશોને તાઈવાનના મુદ્દામાં હસ્તક્ષેપ ન કરવાનો સંદેશ આપ્યો છે. ચીન તરફથી આ અંગે એક નિવેદન પણ બહાર પાડવામાં આવ્યું છે. તેણે જણાવ્યું હતું કે સૈન્યએ તાઇવાનની આસપાસ તેની લડાઇ તત્પરતાનું પરીક્ષણ કર્યું અને લશ્કરી એકમો સાથે સંયુક્ત બળનું પ્રદર્શન કર્યું. જો કે, આ દાવપેચ ક્યાં કરવામાં આવ્યો, ચીને સ્થિતિ સ્પષ્ટ કરી નથી.

ચીનના આ નિવેદનથી અમેરિકા અને તેના સહયોગી દેશો પણ ઘેરાયા હતા. તેમાં કહેવામાં આવ્યું છે કે, અમેરિકા અને તાઈવાન સાથે આવીને વર્તમાન સમયે પરિસ્થિતિને ઉશ્કેરવા સામે આ અમારો સખત પ્રતિસાદ છે. જો જરૂર પડશે તો ઈસ્ટર્ન થિયેટર કમાન્ડ ચીનની એકતા અને અખંડિતતાની સુરક્ષા માટે તમામ જરૂરી પગલાં લેશે.

તાઈવાને પણ આ કવાયત અંગે પ્રતિક્રિયા જારી કરી છે. તાઈવાનના સંરક્ષણ મંત્રાલયે કહ્યું કે ચીનના શક્તિ પ્રદર્શનથી સ્પષ્ટ છે કે તે ક્ષેત્રીય શાંતિની વિરુદ્ધ છે અને તાઈવાનના લોકોને ડરાવવાનો પ્રયાસ કરી રહ્યો છે. તાઈવાન તરફથી એવું કહેવામાં આવ્યું હતું કે ચીની કમ્યુનિસ્ટ પાર્ટીની સેનાના આ ડરાવનારા પગલાં દેખીતી રીતે નાગરિકોની હિંમત તોડવા માટે છે. પરંતુ તાઇવાન તેની સૈન્ય તાકાત વધારવાનું ચાલુ રાખશે.