દેશમાં કયું શહેર છે સૌથી મોંધું અને કયું શહેર છે સસ્તું એ જાણો

દેશની આર્થિક રાજધાની મુંબઈ, અન્ય શહેરોના લોકો માટે રહેવા માટે સૌથી મોંઘું શહેર છે, જ્યારે દિલ્હી રહેવા અને આવાસ ખર્ચની બાબતમાં બીજા ક્રમે છે. આ બંને શહેરો એશિયાના 40 સૌથી મોંઘા શહેરોમાં સામેલ છે. જો કે, આ બંને શહેરો વૈશ્વિક શહેરોની તુલનામાં આર્થિક છે. વિશ્વના 227 શહેરોમાં કરવામાં આવેલા સર્વેમાં આ વાત સામે આવી છે. મર્સરના ‘કોસ્ટ ઓફ લિવિંગ સર્વે, 2022’ અનુસાર, મુંબઈ 127માં ક્રમે સાથે દેશમાં રહેવા અને ખાવા માટે સૌથી મોંઘું શહેર છે. તે જ રીતે આ યાદીમાં દિલ્હી 155માં, ચેન્નાઈ 177માં અને બેંગ્લોર 178માં સ્થાને છે. સર્વેક્ષણમાં જાણવા મળ્યું છે કે પુણે 201મા ક્રમે અને કોલકાતા 203મા ક્રમે છે અને એ બંને શહેર દેશના સૌથી સસ્તા અથવા ઓછા ખર્ચાળ શહેરો છે. વૈશ્વિક શહેરોની યાદીમાં આ તમામ ભારતીય શહેરો વસવાટની સ્થિતિના સંદર્ભમાં વિદેશીઓ માટે સૌથી ઓછા ખર્ચમાં સ્થાન ધરાવે છે.
વૈશ્વિક સ્તરે, હોંગકોંગમાં સૌથી મોઘું શહેર છે, જ્યારે અન્ય સૌથી મોંઘા શહેરોમાં સ્વિત્ઝર્લેન્ડના ઝ્યુરિચ, બેસલ અને બર્ન, ઈઝરાયેલનું તેલ અવીવ, અમેરિકાનું ન્યુયોર્ક, સિંગાપોર, જાપાનનું ટોક્યો અને ચીનનું બેઈજિંગ પણ સામેલ છે. મર્સર દ્વારા આ વર્ષે માર્ચમાં સર્વે કરવામાં આવ્યો હતો. આ વર્ષની રેન્કિંગ પાંચ ખંડોના 227 શહેરોમાં રહેઠાણ, પરિવહન, ખોરાક, કપડાં, ઘરગથ્થુ સામાન અને મનોરંજન સહિત 200 થી વધુ વસ્તુઓની કિંમતોની તુલના કરે છે.
સર્વેક્ષણ મુજબ, દેશમાં તેમનો વ્યવસાય સ્થાપિત કરવા માટે નાણાકીય રાજધાની મુંબઈ MNC માટે સૌથી વધુ પસંદગીનું શહેર છે. તેમજ હૈદરાબાદમાં રહેવું સૌથી સસ્તું છે. જો કે, આવાસની દ્રષ્ટિએ તે પુણે અને કોલકાતા કરતાં મોંઘું છે. તે જ સમયે, મુંબઈમાં ઘર ભાડે રાખવું સૌથી મોંઘું છે. આ પછી નવી દિલ્હી અને બેંગ્લોરનો નંબર આવે છે. ચેન્નાઈ, હૈદરાબાદ, પુણે અને કોલકાતામાં રહેવાની કિંમત મુંબઈની સરખામણીએ 50 ટકાથી ઓછી છે.