ટીમ ઇન્ડિયા માટે સારા સમાચાર, શ્રીલંકા સામેની સિરીઝથી ટીમમાં પરત ફરશે આ બે ખેલાડી

ભારતીય ક્રિકેટ ટીમનું આ વર્ષનું શિડ્યુલ પૂર્ણ થઈ ગયું છે. ઉતાર-ચઢાવથી ભરેલું વર્ષ 2022 ભારતીય ટીમ માટે કંઈ ખાસ નહોતું. આ વર્ષે ઘણા સ્ટાર ખેલાડીઓ ઈજાના કારણે ટીમની બહાર હતા, જેના કારણે ભારતને એશિયા કપ અને વર્લ્ડ કપમાં ભારે હારનો સામનો કરવો પડ્યો હતો. આ ખેલાડીઓની યાદીમાં જસપ્રિત બુમરાહ અને રવિન્દ્ર જાડેજાનું નામ ટોચ પર છે. આ ખેલાડીઓનું આ વર્ષ ઈજાના કારણે લગભગ સંપૂર્ણપણે બરબાદ થઈ ગયું હતું. ભારતીય ટીમે હવે આવતા વર્ષે એટલે કે જાન્યુઆરી 2023માં મેચ રમવાની છે. ભારત વર્ષની શરૂઆત શ્રીલંકા સામે મર્યાદિત ઓવરની મેચોથી કરવા જઈ રહ્યું છે. બંને ટીમો વચ્ચે ત્રણ મેચની ટી-20 સિરીઝ 3 જાન્યુઆરીથી અને ત્રણ મેચની વનડે સિરીઝ 10 જાન્યુઆરીથી રમાશે.

હકાલપટ્ટી કરાયેલ ચેતન શર્માની આગેવાની હેઠળની પસંદગી સમિતિ દ્વારા આ શ્રેણી માટેની ટીમની જાહેરાત કરવાની બાકી છે. અનુમાન લગાવવામાં આવી રહ્યું છે કે મંગળવારે ભારતીય ટીમની જાહેરાત થઈ શકે છે. મીડિયા રિપોર્ટ્સ અનુસાર, હાર્દિક પંડ્યાને T20 સિરીઝ માટે કેપ્ટન બનાવવામાં આવશે. ભારતીય ટીમનો નિયમિત સુકાની રોહિત શર્મા તાજેતરમાં બાંગ્લાદેશ સામે રમાયેલી વનડે શ્રેણી દરમિયાન ઈજાગ્રસ્ત થયો હતો. આવી સ્થિતિમાં તેના માટે આ શ્રેણીમાં રમવું મુશ્કેલ લાગી રહ્યું છે. આ T20 ટીમમાં ઘણા ફેરફારો જોવા મળી શકે છે. પસંદગી સમિતિ આ શ્રેણી માટે યુવા ખેલાડીઓને તક આપી શકે છે. ઘણા સિનિયર ખેલાડીઓની રજા લગભગ નિશ્ચિત માનવામાં આવે છે. આવી સ્થિતિમાં હાર્દિક પંડ્યા નવી અને યુવા ટીમ સાથે કેપ્ટન તરીકે જોવા મળી શકે છે.

જસપ્રીત બુમરાહ આ વર્ષે ઓસ્ટ્રેલિયા સામે ઘરઆંગણે રમાયેલી T20 શ્રેણી બાદથી ટીમની બહાર છે. બુમરાહ પીઠની ઈજામાંથી સાજો થઈ રહ્યો છે. બીજી તરફ રવિન્દ્ર જાડેજાની વાત કરીએ તો તે એશિયા કપ દરમિયાન ઘૂંટણની ઈજા સાથે સંઘર્ષ કરી રહ્યો છે. જોકે તે આ ઈજામાંથી સાજો થઈ ગયો છે. ભારતીય ટીમે શ્રીલંકા સામે ત્રણ ટી-20 મેચ બાદ વનડે શ્રેણી પણ રમવાની છે. મીડિયા રિપોર્ટ્સનું માનીએ તો આ બંને સ્ટાર ખેલાડી આ સિરીઝ દરમિયાન ટીમમાં વાપસી કરી શકે છે. ભારતમાં વર્ષ 2023માં ODI વર્લ્ડ કપ રમાવાનો છે. આ પહેલા આ ખેલાડીઓ જેટલી જલ્દી પૂરતી પ્રેક્ટિસ માટે ટીમમાં પરત ફરશે તેટલું જ તેમના માટે સારું રહેશે. ટીમ ઈન્ડિયાના કેપ્ટન રોહિત શર્મા પણ આ સિરીઝમાં વાપસી કરી શકે છે.