આઇસીસીના પ્રમુખ પદે ગ્રેગ બાર્કલેની પુનઃ પસંદગી, જય શાહને મળી મહત્વની જવાબદારી

બીસીસીઆઈના સચિવ જય શાહને ઈન્ટરનેશનલ ક્રિકેટ કાઉન્સિલની નાણા અને વાણિજ્યિક બાબતોની સમિતિના વડા તરીકે પસંદ કરવામાં આવ્યા છે. જો કે સમાચાર લખાય છે ત્યાં સુધી આ અંગે કોઈ ઔપચારિક જાહેરાત કરવામાં આવી નથી. સૂત્રોના જણાવ્યા અનુસાર ટૂંક સમયમાં તેની જાહેરાત થઈ શકે છે.

ન્યૂઝીલેન્ડના ગ્રેગ બાર્કલેને સર્વસંમતિથી ICCના અધ્યક્ષ તરીકે પસંદ કરવામાં આવ્યા હતા. ગ્રેગ બાર્કલી બીજી વખત આ પદ પર ચૂંટાયા છે, ગ્રેગ બાર્કલીનો કાર્યકાળ 2 વર્ષનો રહેશે. ઝિમ્બાબ્વેના તાવેન્ગવા મુકુહલાની પણ ICC અધ્યક્ષ પદના દાવેદાર હતા, પરંતુ તેમના હટી ગયા પછી, ગ્રેગ બાર્કલે સર્વસંમતિથી બીજી મુદત માટે ચૂંટાયા હતા. અગાઉ, ગ્રેગ બાર્કલી નવેમ્બર 2020 માં ICC અધ્યક્ષ તરીકે ચૂંટાયા હતા.

ICC અધ્યક્ષ પહેલા, ગ્રેગ બાર્કલે ન્યૂઝીલેન્ડ ક્રિકેટના અધ્યક્ષ અને 2015માં ICC મેન્સ ક્રિકેટ વર્લ્ડ કપના ડિરેક્ટર હતા. આઈસીસીના અધ્યક્ષ તરીકે ચૂંટાયા બાદ ગ્રેગ બાર્કલેએ કહ્યું કે ઈન્ટરનેશનલ ક્રિકેટ કાઉન્સિલના અધ્યક્ષ તરીકે ફરીથી ચૂંટાઈ આવવું સન્માનની વાત છે. તેમણે કહ્યું કે હું મારા સાથી ICC નિર્દેશકોનો તેમના સમર્થન માટે આભાર માનું છું.