ગુજરાત પ્રદેશ ભાજપ દ્વારા વલસાડના વકીલ પ્રવીણ પટેલને સોંપાઇ મોટી જવાબદારી

હાલ ગુજરાતમાં ભારતીય જનતા પાર્ટી પોતાના સંગઠનને વધુ મજબુત કરવાનો પ્રયાસ કરી રહી છે અને તેને લીધે વિવિધ સેલના પદાધિકારીઓની નિમણુકની પ્રક્રિયા ચાલી રહી છે. એવામાં વલસાડના જાણીતા એડવોકેટ તથા નોટરી પ્રવીણ ડી. પટેલ જેમને લોકો પીડીના નામે જાણે છે તેમની ગુજરાત પ્રદેશ ભાજપ દ્વારા પ્રદેશ વિધિ ( કાયદાવિષયક ) ( લીગલ ) સેલના પ્રદેશ સદસ્યશ્રી તરીકે પસંદગી કરવામાં આવી છે. પ્રવીણ પટેલ છેલ્લા ઘણા વર્ષોથી વલસાડ જિલ્લા ભાજપ લીગલ સેલના પ્રમુખ રહ્યા છે તથા છેલ્લા કેટલાક વર્ષથી સાઉથ ઝોન ભાજપ લીગલ સેલના સહ-કન્વીનર તરીકે પણ તેઓએ કાર્ય કર્યુ છે. એટલે કે તેમના અનુભવનો હવે ભાજપને રાજ્ય સ્તરે ફાયદો મળશે.
ઉલ્લેખનીય છે કે પી. ડી. પટેલ છેલ્લા 18 વર્ષથી વલસાડ જિલ્લા વકીલ મંડળના પ્રમુખ તરીકે પણ બિરાજમાન છે. ગુજરાતના પંચાશી હજાર જેટલા વકીલો ની માતૃસંસ્થા એવી બાર કાઉન્સિલ ઓફ ગુજરાતના પૂર્વ વાઇસ-ચેરમેન તથા હાલમાં બાર કાઉન્સિલ ઓફ ગુજરાતની પ્રતિષ્ઠિત એવી જીલએલએચ કમિટી તથા શિસ્ત સમિતિ ના ચેરમેન તરીકે પણ પ્રવીણ પટેલે સેવા આપી છે. તેઓ હાલમાં સાઉથ ઝોન નોટરી એસોસિયેશન ઓફ ગુજરાતના પણ ચેરમેન છે.
પી. ડી. પટેલે તેમની પ્રદેશ લીગલ સેલમાં સદસ્ય તરીકે પસંદગી થતા ગુજરાત પ્રદેશ ભાજપના પ્રમુખ સી. આર. પાટીલ તથા પ્રદેશ મહામંત્રી શ્રી પ્રદીપસિંહજી તથા પ્રદેશ ભાજપ ના સૌ મહાનુભાવો તેમજ વલસાડ જિલ્લા ભાજપના પ્રમુખશ્રી હેમંતભાઈ કંસારાજી તથા જિલ્લા ભાજપના સૌ હોદ્દેદારો પ્રત્યે આભાર વ્યક્ત કર્યો હતો. પી. ડી. પટેલ ની વરણી ને સમગ્ર ગુજરાતના અને વલસાડ નવસારી જિલ્લાના વકીલોએ વધાવી અભિનંદન પાઠવ્યા હતા.