દિવાળી દરમિયાન, મોટી સંખ્યામાં ગુજરાતના પ્રવાસીઓ રાજસ્થાનના માઉન્ટ આબુની મુલાકાત લેતા હોય છે, જે રાજસ્થાન રાજ્યનું એકમાત્ર પહાડી પર્યટન સ્થળ છે. પરંતુ હવે અહીં પ્રવાસીઓ સાથે મારપીટ અને દુર્વ્યવહારની ઘટનાઓ પ્રકાશમાં આવી રહી છે. આ ઘટનાઓ બાદ પ્રવાસીઓ માઉન્ટ આબુ અને અન્ય પર્યટન સ્થળોની મુલાકાત લેવામાં નિરાશા દર્શાવી રહ્યા છે.
ગત સોમવારે સાંજે આબુ રોડના અંબાજી રોડ પર આવેલી સિયાવા દારૂની દુકાનમાં લાકડીઓ સાથે ગુજરાતી પ્રવાસીઓ સાથે ઉગ્ર બોલાચાલી થઈ હતી. જેનો વીડિયો સોશિયલ મીડિયા પર વાયરલ થયો છે. દુકાનમાં હાજર લોકોએ તેના પર લાકડીઓ વડે હુમલો કર્યો હતો. આ ઘટનાનો વીડિયો પણ સામે આવ્યો છે. જેમાં 3-4 યુવકો લાકડીઓ વડે મારતા સ્પષ્ટ દેખાય છે.
સ્થાનિક પોલીસના જણાવ્યા અનુસાર, ગુજરાતના પ્રવાસીઓએ દારૂના દુકાનદારને છરી બતાવી તેની સાથે દુર્વ્યવહાર કર્યો હતો. જે બાદ વિવાદ થયો હતો. પોલીસે આ કેસમાં બે લોકોની શાંતિ ભંગના આરોપમાં ધરપકડ કરી છે. પોલીસે જણાવ્યું હતું કે ગુજરાતમાંથી આવેલા કેટલાક યુવાનોએ દારૂની દુકાન પર દારૂની કિંમત બાબતે અસભ્ય વર્તન કર્યું હતું અને પછી છરી બતાવી હતી.
ઘટના બાદ ત્યાં હાજર લોકોએ પોલીસને જાણ કરી હતી. પોલીસ ઘટનાસ્થળે પહોંચી ત્યારે આરોપી યુવક પોતાની કાર લઈને ફરાર થઈ ગયો હતો. પોલીસે તેમનો પીછો કરીને રિકો કોલોની પાસે તેમને પકડી પાડ્યા હતા. આ કેસમાં શાંતિ ભંગના આરોપમાં બે યુવકોની ધરપકડ કરવામાં આવી છે.
લડાઈ દરમિયાન સામેલ અન્ય લોકોની પણ ઓળખ કરવામાં આવી રહી છે. કારણ કે વીડિયોમાં તેઓ લડતા જોવા મળે છે, પરંતુ તેઓ સ્થળ પરથી ભાગી ગયા હતા. પોલીસ તમામને શોધી રહી છે. રાજ્યનું એકમાત્ર હિલ સ્ટેશન સિરોહીમાં આવેલું છે. જ્યાં ગુજરાત સહિત અનેક રાજ્યોમાંથી લાખો પ્રવાસીઓ મુલાકાત લેવા આવે છે.