અમદાવાદમાં ટ્રક ચાલકે એક્ટિવા સવાર દંપત્તિને અટફેટે લીધાં, પત્નીનું ઘટનાસ્થળે મોત, પતિ ગંભીર

અમદાવાદ શહેરના હાટકેશ્વર વિસ્તારમાં ટ્રકે એક્ટિવા પર સવાર દંપતીને ટક્કર મારી હતી. આ અકસ્માતમાં પત્નીનું ટ્રકે કચડી નાખતાં મોત થયું હતું. જ્યારે તેનો પતિ ગંભીર રીતે ઘાયલ થયો હતો. પતિનો આરોપ છે કે અકસ્માત ટ્રક ડ્રાઈવરની બેદરકારીને કારણે થયો છે, તેમ છતાં પોલીસે તેની સામે સામાન્ય કલમો હેઠળ કેસ નોંધ્યો છે. આ ઘટના શુક્રવારે રાત્રે બની હતી જ્યારે અમદાવાદના વસ્ત્રાલમાં રહેતો દિનેશ યાદવ તેની પત્ની સુશીલા યાદવ સાથે તેના ભાઈ ભૂપેશ યાદવના ઘરે જમવા ગયો હતો. બેંકમાં ફરજ બજાવતા દિનેશ યાદવ અને સુશીલા યાદવ જમ્યા બાદ એક્ટિવા પર વસ્ત્રાલ સ્થિત પોતાના ઘરે પરત જઈ રહ્યા હતા. ત્યારે હાટકેશ્વર ત્રણ રસ્તા પાસે સામેથી આવતી ટ્રકે એક્ટિવા પર સવાર યાદવ દંપતીને અડફેટે લીધા હતા.

ટ્રકની ટક્કરથી દિનેશ અને સુશીલા રોડ પર પડી ગયા હતા. ટ્રકે રસ્તા પર પડી ગયેલી સુશીલાને કચડીને આગળ નીકળી ગઈ હતી. આ અકસ્માતમાં સુશીલા યાદવનું માથામાં ઈજા થવાથી ઘટનાસ્થળે જ મોત થયું હતું. જ્યારે તેનો પતિ દિનેશ યાદવ ગંભીર રીતે ઘાયલ થયો હતો. I ડિવિઝન ટ્રાફિક પોલીસે ટ્રક ચાલક સામે IPC કલમ 279, 337, 338, 304A અને MV એક્ટ 177, 184, 134(B) હેઠળ કેસ નોંધ્યો છે.

દિનેશ યાદવનો આરોપ છે કે આ અકસ્માત ડ્રાઈવરની ગંભીર બેદરકારીને કારણે થયો હોવા છતાં પોલીસે ડ્રાઈવર વિરુદ્ધ સામાન્ય કલમો હેઠળ કેસ નોંધ્યો છે. એટલું જ નહીં, ટ્રક ચાલક વાહનને ટક્કર માર્યા બાદ આગળ આવ્યો હતો અને તેનો પણ રિપોર્ટમાં ઉલ્લેખ કરવામાં આવ્યો હતો. તેમ છતાં ટ્રક ચાલક સામે ગંભીર કલમો હેઠળ ગુનો નોંધવામાં ન આવતા પોલીસની કાર્યવાહી પર સવાલો ઉભા થયા છે.