પ્રથમ વનડેમાં ભારતીય બોલર ફેલ, દ.આફ્રિકાના બે બેટરોએ મારી સદી

ટેમ્બા બાવુમા અને રાસી વાન ડેર ડુસેને પ્રથમ ODIમાં શાનદાર સદી ફટકારી હતી. પ્રથમ બેટિંગ કરતા દક્ષિણ આફ્રિકાએ બંને બેટ્સમેનોની મોટી ઇનિંગ્સના આધારે 4 વિકેટે 296 રન બનાવ્યા છે. આવી સ્થિતિમાં ટીમ ઈન્ડિયાને પ્રથમ મેચમાં મોટો ટાર્ગેટ મળ્યો છે. કેપ્ટન કેએલ રાહુલે હવે સારી બેટિંગ કરવી પડશે. આ સાથે વિરાટ કોહલી પાસેથી પણ સારી ઇનિંગની અપેક્ષા રાખવામાં આવશે. આ પહેલા દક્ષિણ આફ્રિકાએ ટેસ્ટ શ્રેણી 2-1થી કબજે કરી હતી.

ટેમ્બા બાવુમાએ 143 બોલમાં 110 રન બનાવ્યા હતા. તેણે પોતાની ઇનિંગમાં 8 ચોગ્ગા માર્યા હતા. તેણે રાસી વાન ડેર ડુસેન સાથે ચોથી વિકેટ માટે 204 રનની મોટી ભાગીદારી કરી હતી. દુસૈન 96 બોલમાં 129 રન બનાવીને અણનમ રહ્યો હતો. 9 ચોગ્ગા અને 4 છગ્ગા ફટકાર્યા. ટીમે છેલ્લી 10 ઓવરમાં 86 રન બનાવ્યા હતા. મેચમાં ટેમ્બા બાવુમાએ ટોસ જીતીને બેટીંગ પસંદ કરી હતી. જોકે ટીમની શરૂઆત સારી રહી ન હતી. જસપ્રીત બુમરાહે 5મી ઓવરમાં જાનેમન માલન (6)ને આઉટ કર્યો હતો.

આક્રમક બેટ્સમેન એડન માર્કરામ (4) મોટી ઇનિંગ્સ રમવામાં નિષ્ફળ ગયો હતો અને તે રનઆઉટ થયો હતો. વિકેટ કીપર બેટ્સમેન ક્વિન્ટન ડી કોક સારી શરૂઆત બાદ મોટો સ્કોર બનાવી શક્યો ન હતો. તે 41 બોલમાં 25 રન બનાવીને ઓફ સ્પિનર ​​આર અશ્વિન દ્વારા બોલ્ડ થયો હતો. તેણે 2 ચોગ્ગા ફટકાર્યા હતા. 68 રનમાં 3 વિકેટ પડી ગયા બાદ બાવુમા અને ડુસેને ટીમની કમાન સંભાળી હતી. આ મેચમાં ટીમ ઈન્ડિયાએ વેંકટેશ અય્યરને મેદાનમાં ઉતાર્યો હતો. આ તેનું વનડે ડેબ્યુ પણ છે. પરંતુ આ ફાસ્ટ બોલરે એક પણ ઓવર નાંખી ન હતી. લેગ સ્પિનર ​​યુઝવેન્દ્ર ચહલ અને સિનિયર ફાસ્ટ બોલર ભુવનેશ્વર કુમાર વિકેટ લઈ શક્યા ન હતા. બુમરાહને 2 વિકેટ મળી હતી.

દક્ષિણ આફ્રિકા તરફથી ડેવિડ મિલર 2 બોલમાં 2 રન બનાવીને અણનમ રહ્યો હતો. ફાસ્ટ બોલર શાર્દુલ ઠાકુરને પણ વિકેટ મળી ન હતી. તેણે ટેસ્ટ શ્રેણીમાં બોલ સાથે સારો દેખાવ કર્યો હતો.