IPL 2022 મેગા ઓક્શનઃ 10 માર્કી ખેલાડીઓની હરાજી થઇ પૂરી, જાણો ક્યો ખેલાડી કઇ ટીમ તરફથી રમશે

IPL 2022ની મેગા ઓક્શન બેંગ્લોરમાં શરૂ થઈ ગઈ છે. આ વખતે હરાજીમાં 600 દેશી અને વિદેશી ખેલાડીઓની બોલી લગાવવામાં આવી રહી છે. પ્રથમ દિવસની હરાજી માર્કી ખેલાડીઓની હરાજી સાથે શરૂ થઈ છે. માર્કી ખેલાડીઓની બેઝ પ્રાઇસ 2-2 કરોડ રૂપિયા હતી. આવો જાણીએ આ 10 માર્કી ખેલાડીઓ વિશે-શિખર ધવન (8.2 કરોડ): શિખર ધવનની બોલીથી હરાજી શરૂ થઈ. રાજસ્થાન રોયલ્સે ધવનને ખરીદવા માટે પહેલી બોલી લગાવી, ત્યારબાદ દિલ્હી કેપિટલ્સે ધવનને ખરીદવામાં રસ દાખવ્યો. બાદમાં પંજાબ કિંગ્સે પણ આ રેસમાં ઝંપલાવ્યું હતું. લાંબા સંઘર્ષ બાદ પંજાબ કિંગ્સે શિખર ધવનને 8.2 કરોડ રૂપિયામાં ખરીદ્યો.

રવિચંદ્રન અશ્વિન (5 કરોડ): દિલ્લી કેપિટલ્સે અનુભવી ઓફ-સ્પિનર ​​રવિચંદ્રન અશ્વિન માટે 2 કરોડની બોલી લગાવી, ત્યારબાદ રાજસ્થાન રોયલ્સ પણ તેની સાથે આવી. આખરે, રાજસ્થાન રોયલ્સે રવિચંદ્રન અશ્વિનને 5 કરોડ રૂપિયામાં ખરીદ્યો. અશ્વિન અગાઉ આઈપીએલમાં દિલ્હી કેપિટલ્સ, ચેન્નાઈ સુપર કિંગ્સ, રાઈઝિંગ પૂણે સુપરજાયન્ટ્સ અને કિંગ્સ ઈલેવન પંજાબનો ભાગ રહી ચૂક્યો છે.

પેટ કમિન્સ (7.25 કરોડ): ઓસ્ટ્રેલિયાની ટેસ્ટ ટીમના કેપ્ટન પેટ કમિન્સ તેની અગાઉની ટીમ કોલકાતા નાઈટ રાઈડર્સમાં પરત ફર્યા છે. કોલકાતાએ પેટ કમિન્સને રૂ. 7.25 કરોડમાં ખરીદ્યો હતો, એટલે કે છેલ્લી વખત કરતાં અડધી રકમ. નોંધપાત્ર રીતે, કમિન્સને આઈપીએલ 2020ની હરાજીમાં કોલકાતા નાઈટ રાઈડર્સ દ્વારા 15.50 કરોડ રૂપિયાની ભારે કિંમતે ખરીદ્યો હતો.

કાગિસો રબાડા (9.25 કરોડ): દક્ષિણ આફ્રિકાના ફાસ્ટ બોલર કાગિસો રબાડાને પંજાબ કિંગ્સે 9.25 કરોડ રૂપિયામાં ખરીદ્યો છે. આ યુદ્ધમાં પંજાબ ઉપરાંત ગુજરાત અને દિલ્હીની ટીમોએ પણ ભાગ લીધો હતો, પરંતુ અંતિમ દાવ પંજાબ કિંગ્સના હાથમાં હતો. પંજાબ કિંગ્સ રબાડાની બીજી ટીમ છે. અગાઉ રબાડાએ દિલ્હી કેપિટલ્સ માટે તમામ 50 આઈપીએલ મેચ રમી હતી.

ટ્રેન્ટ બોલ્ટ (8 કરોડ): કિવી ફાસ્ટ બોલર ટ્રેન્ટ બોલ્ટને રાજસ્થાન રોયલ્સે 8 કરોડ રૂપિયામાં ખરીદ્યો હતો. RCB, મુંબઈ ઈન્ડિયન્સ પણ બોલ્ટને ખરીદવા ઈચ્છતા હતા, પરંતુ રાજસ્થાન આ યુદ્ધમાં વિજેતા તરીકે ઉભરી આવ્યું.બોલ્ટ IPLમાં સનરાઈઝર્સ હૈદરાબાદ (SRH), કોલકાતા નાઈટ રાઈડર્સ (KKR), દિલ્હી કેપિટલ્સ અને મુંબઈ ઈન્ડિયન્સ (MI)નો ભાગ રહી ચુક્યો છે. બોલ્ટે અત્યાર સુધી 62 IPL મેચમાં 76 વિકેટ લીધી છે.

શ્રેયસ અય્યર (12.25 કરોડ): આ સિઝનમાં તે કોલકાતા નાઈટ રાઈડર્સ તરફથી રમતા જોવા મળશે. KKR એ શ્રેયસને રૂ. 12.25 કરોડમાં ખરીદ્યો. શ્રેયસ ઐયરને ખરીદવાની રેસમાં દિલ્હી, બેંગલુરુ, ગુજરાત, લખનઉ જેવી ટીમો પણ સામેલ હતી. KKR એક કેપ્ટનની શોધમાં છે, તેથી શ્રેયસ અય્યર શ્રેષ્ઠ વિકલ્પ બની શકે છે.

મોહમ્મદ શમી (6.25 કરોડ): ફાસ્ટ બોલર મોહમ્મદ શમીને ગુજરાત ટાઇટન્સે 6.25 કરોડ રૂપિયામાં ખરીદ્યો છે. શમીએ અત્યાર સુધી 77 IPL મેચોમાં 30.40ની એવરેજ અને 8.62ના ઈકોનોમી રેટથી 79 વિકેટ લીધી છે. તેણે પંજાબ, કોલકાતા નાઈટ રાઈડર્સ અને દિલ્હી ફ્રેન્ચાઈઝી માટે આઈપીએલમાં ભાગ લીધો છે.

ફાફ ડુ પ્લેસિસ (7 કરોડ): દક્ષિણ આફ્રિકાના બેટ્સમેન ફાફ ડુ પ્લેસિસને રોયલ ચેલેન્જર્સ બેંગ્લોરે 7 કરોડ રૂપિયામાં ખરીદ્યો છે. ભૂતપૂર્વ કેપ્ટન ફાફ ડુ પ્લેસિસ ઘણા વર્ષો સુધી ચેન્નાઈ સુપર કિંગ્સના મુખ્ય સભ્ય હતા. ડુ પ્લેસિસે 2021માં CSKના વિજય અભિયાનમાં મહત્વની ભૂમિકા ભજવી હતી. તે ગત સિઝનમાં સૌથી વધુ રન બનાવનાર બીજા ક્રમે હતો.

ક્વિન્ટન ડી કોક (6.75 કરોડ): આ વિકેટ કીપર બેટ્સમેન IPL 2022માં લખનૌ ફ્રેન્ચાઇઝી માટે રમતા જોવા મળશે. ડેકોકને લખનૌ સુપર જાયન્ટ્સે રૂ. 6.75 કરોડમાં ખરીદ્યો હતો. ડેકોક અગાઉ IPLમાં સનરાઈઝર્સ હૈદરાબાદ, દિલ્હી કેપિટલ્સ, રોયલ ચેલેન્જર્સ બેંગ્લોર (RCB) અને મુંબઈ ઈન્ડિયન્સનો ભાગ રહી ચૂક્યો છે.

ડેવિડ વોર્નર (6.25 કરોડ): ઓસ્ટ્રેલિયાના ઓપનર ડેવિડ વોર્નરને દિલ્હી કેપિટલ્સે રૂ. 6.25 કરોડમાં ખરીદ્યો છે. વોર્નર અગાઉ સનરાઇઝર્સનો ભાગ હતો. વોર્નરે 2021 સિવાય સનરાઇઝર્સ માટે દરેક સિઝનમાં 500થી વધુ રન બનાવ્યા છે. તેમ છતાં સનરાઇઝર્સે તેને છોડ્યો. ત્રણ વખત ઓરેન્જ કેપ કબજે કરનાર વોર્નરે પોતાની કેપ્ટનશીપમાં સનરાઇઝર્સને ચેમ્પિયન પણ બનાવ્યું છે.