ભાજપના સાંસદો, નેતાઓ અને કાર્યકર્તાઓ માટે આ રંગની ટોપી પહેરવી ફરજિયાત, ગુજરાત ભાજપ તૈયાર કરી કિટ

ભાજપના સાંસદો અને કાર્યકરો હવે ભગવા રંગની ટોપીઓમાં જ જોવા મળશે. વડાપ્રધાન નરેન્દ્ર મોદીએ ગયા મહિને અમદાવાદમાં રોડ શો દરમિયાન આ ટોપી પહેરી હતી. હવે આ ટોપી ભાજપના લોકસભા અને રાજ્યસભા સાંસદો ઉપરાંત તમામ મોટા નેતાઓને મોકલવામાં આવી રહી છે. આગામી દિવસોમાં આ ટોપી ભાજપના કાર્યકરોની ઓળખ બનશે તેવી આશા છે.

ભાજપના સંસદીય દળના કાર્યાલયને દરેક ભાજપના સાંસદ સુધી આ કેપ પહોંચાડવાની જવાબદારી સોંપવામાં આવી છે. કિટ સાથે આ ટોપી લોકસભા અને રાજ્યસભા સહિત ભાજપના તમામ 400 સાંસદોને પહોંચાડવામાં આવી રહી છે. આ કીટમાં ભાજપ ચિહ્નવાળી પાંચ કેપ્સ અને પૌષ્ટિક ચોકલેટ છે. એવું માનવામાં આવે છે કે ભાજપના સાંસદો જાહેરમાં આ ટોપી પહેરશે. આ ઉપરાંત ભાજપના મહેનતુ કાર્યકરો કેસરી ટોપી અને ખેસ પણ પહેરશે જેને અંગવસ્ત્ર અથવા ગમછા પણ કહેવાય છે.

મળતી માહિતી મુજબ ગુજરાત ભાજપે ખાસ આ કેપ તૈયાર કરી છે. આ નવી કેપની ડિઝાઇનમાં બ્રહ્મકમલ ફૂલ છે જે ઉત્તરાખંડમાંથી લેવામાં આવ્યું છે. આ વખતે પીએમ મોદીએ ગણતંત્ર દિવસની પરેડમાં પણ આ કેપ પહેરી હતી. વાસ્તવમાં આ ભગવા ટોપી ભારતીય જનતા પાર્ટી અને તેની વિચારધારા સાથે જોડાયેલી છે. આઝાદી પહેલા આરએસએસના કાર્યકરો ભગવા રંગની ટોપીઓ પહેરતા હતા. હવે ભાજપ પોતાની ઓળખ સમાન ટોપી બનાવવા જઈ રહી છે. ભાજપે કેસરી ટોપીમાં કમળનું ફૂલ લગાવીને આ ટોપીને પોતાની પાર્ટીની ઓળખ તરીકે સત્તાવાર રીતે જાહેર કરી છે.