ગુજરાતમાં બુર્જ ખલીફાને ટક્કર મારે તેવા બિલ્ડિંગોનું નિર્માણ હવે શક્ય બનશે

ભારતના વિકાસ માટેના મોડેલ સ્ટેટ ગણાતા ગુજરાતમાં વર્તમાન રુપાણી સરકારે નવો એક મહત્વનો નિર્ણય બાંધકામ ક્ષેત્ર અંગે લીધો છે. સરકારના આ નિર્ણયને પગલે આઇકોનિક બિલ્ડીંગ સ્ટ્રકચરનું નિર્માણ કરવું સરળ બની જશે. 2020માં ૧૮ની ઓગસ્ટે ગુજરાતના મુખ્યમંત્રી વિજય રૂપાણીએ રાજ્યના પાંચ મહાનગરોમાં સિંગાપોર-દુબઇની જેમ સ્કાય સ્ક્રેપર્સ, ગગનચૂંબી ઇમારતો-આઇકોનિક સ્ટ્રકચર્સના બાંધકામને પરવાનગી આપવા માટે જાહેરાત કરી હતી. આ સમયે તેમણે પ્રાથમિક જાહેરનામું-પ્રાયમરી નોટિફીકેશન બહાર પાડવા પણ મંજૂરી આપી હતી. જાહેરનામામાં સરકારના પ્રસ્તાવ અંગે વાંધા-સૂચનો રજૂ કરવા અપીલ કરાઈ હતી. દરમિયાન મંગળવારે મુખ્યમંત્રી વિજય રૂપાણીએ આઇકોનિક બિલ્ડીંગ સ્ટ્રકચર નિર્માણ અંગેના જાહેરનામાને લીલીઝંડી આપી દીધી હતી. આ સાથે જ મુખ્યમંત્રીએ શહેરી વિકાસ માટે રાજ્ય સરકાર પ્રતિબદ્ધતા હોવાના સંકેત આપ્યા હતા. મંગળવારે સુઆયોજિત શહેરી વિકાસની નેમ સાથે ટી.પી. સ્કીમને રૂપાણીએ મંજુરી આપી હતી.
વિજય રૂપાણીએ આયોજનબદ્ધ શહેરી વિકાસને આગળ ધપાવવા સરકારે આ નિર્ણય કર્યો હોવાનું જણાવ્યું છે. મુખ્યમંત્રી દ્વારા મંજૂર કરવામાં આવેલી બે ડ્રાફ્ટ ટી.પી.સ્કીમમાં ભાવનગર શહેરની ટી.પી.સ્કીમ નં ૩૦ (ચિત્રા) તથા શામળાજી મંદિર પરિસર તથા આસપાસના વિકાસ માટે જરૂરી ફેરફારો સાથેની ટી.પી.સ્કીમનો સમાવેશ થાય છે. આ ઉપરાંત અમદાવાદની ફાઈનલ ટી.પી.સ્કીમ નં ૫૧ (પૂર્વ ખોખરા-મહેમદાબાદ), મેમનગર નં-૧ (સેકન્ડ વેરીડ) તથા ગાંધીનગરની ફાઈનલ ટી.પી.સ્કીમ નં. ૯/બી વાસણા- હડમતીયા- સરગાસણ-વાવોલ)નો ઉલ્લેખ મંજૂર ફાયલમાં કરાયો છે.
સરકારના આ નિર્ણય બાદ હવે અમદાવાદ, વડોદરા, સુરત, રાજકોટ અને ગાંધીનગરમાં સ્કાય રાઇઝડ આઇકોનીક ઇમારતોના બાંધકામનો માર્ગ મોકળો બની ગયો છે. આવા બાંધકામ કરવા માંગતા લોકોને કાયદાકીય રીતે અને મંજૂરીની પ્રક્રિયામાં ઝાઝી કનડગત કે મુશ્કેલી રહેશે નહી. કારણ કે, સરકારે સીજીડીઆર-૨૦૧૭ના રેગ્યુલેશનમાં ફેરફાર કરીને પ્રાથમિક જાહેરનામા બાદ આવેલા વાંધા સુચનોને ધ્યાને લઈને જાહેરનામાને મંજુરી આપી છે. અમદાવાદ, વડોદરા, સુરત, રાજકોટ અને ગાંધીનગર કોર્પોરેશન અને સત્તા મંડળોને ગગનચુંબી ઈમારતોને મંજૂરી આપવાની સત્તા આપવામાં આવી છે. સરકારને આશા છે કે તેના આ નિર્ણયથી ગુજરાતના શહેરો પણ દુનિયામાં હાઇરાઇઝડ આઇકોનીક સ્ટ્રકચરોથી પોતાની આગવી ઓળખ ઉભી કરી શકશે. મંજૂરી મળતા રાજ્યના પાંચ મહાનગરોમાં વધુ ઉંચાઈ ધરાવતા હાઇરાઇઝડ બિલ્ડીંગ્સ સ્ટ્રકચરના નિર્માણનો નવો યુગ શરૂ થશે.