હત્યા કે આત્મહત્યા? ગોવામાં રશિયન મુળની અભિનેત્રીની લાશ ફ્લેટમાંથી લટકેલી હાલતમાં મળી આવી

24 વર્ષીય રશિયન અભિનેત્રી એલેક્ઝાન્ડ્રા જાવી, જે તમિલ ફિલ્મ કંચના 3 માં જોવા મળી હતી, તેનું મોત થયું છે. શુક્રવારે એલેક્ઝાન્ડ્રાની લાશ ગોવામાં તેના ભાડાના ફ્લેટમાં લટકતી મળી આવી હતી. તે ઉત્તર ગોવાના સિઓલિમ ગામમાં રહેતી હતી. હાલમાં, ગોવા પોલીસ પોસ્ટ-મોર્ટમ માટે રશિયન કોન્સ્યુલેટની પરવાનગીની રાહ જોઈ રહી છે. એક વરિષ્ઠ પોલીસ અધિકારીએ જણાવ્યું કે એલેક્ઝાન્ડ્રાનો મૃતદેહ શબઘરમાં રાખવામાં આવ્યો છે. તેઓ એલેક્ઝાન્ડ્રાના શરીર પર શબપરીક્ષણ કરવા માટે રશિયન કોન્સ્યુલેટ દ્વારા નો ઓબ્જેક્શન સર્ટિફિકેટ (એનઓસી) ની રાહ જોઈ રહ્યા છે. બીજી બાજુ, પોલીસે આ મામલાની તપાસ શરૂ કરી છે અને એલેક્ઝાન્ડ્રાના બોયફ્રેન્ડનું નિવેદન નોંધ્યું છે. એલેક્ઝાન્ડ્રાનો બોયફ્રેન્ડ પણ તેની સાથે તે એપાર્ટમેન્ટમાં રહેતો હતો અને ઘટના સમયે બહાર ગયો હતો.
મુંબઈ રશિયન કોન્સ્યુલેટના ગોવાના પ્રતિનિધિ એડવોકેટ વિક્રમ વર્માએ ચેન્નઈ સ્થિત ફોટોગ્રાફર પર આશંકા વ્યક્ત કરી છે. તેણે એલેક્ઝાન્ડ્રાના મૃત્યુમાં તે ફોટોગ્રાફરની ભૂમિકાની શંકા રાખીને આ મામલાની તપાસ કરવા પોલીસને કહ્યું છે. એલેક્ઝાન્ડ્રાએ 2019 માં ચેન્નાઈમાં ફોટોગ્રાફર વિરુદ્ધ હેરાનગતિની ફરિયાદ નોંધાવી હતી. વકીલ વર્માએ કહ્યું, ‘મને કહેવામાં આવ્યું કે ચેન્નાઈમાં એક પુરુષે એક મહિલા (એલેક્ઝાન્ડ્રા) નો પીછો કર્યો અને તેને બ્લેકમેલ કર્યો. પ્રાથમિક તપાસ બાદ આરોપી સામે પૂરતા પુરાવા મળ્યા હતા જે બાદ ચેન્નઈ પોલીસે એફઆઈઆર નોંધાવી હતી. એલેક્ઝાન્ડ્રાના શંકાસ્પદ મૃત્યુના કેસમાં એડવોકેટ વર્માએ કહ્યું કે આ કેસના અન્ય પાસાઓ પણ હોઈ શકે છે જે સ્પષ્ટ દેખાતા નથી. તેમણે વધુમાં કહ્યું કે રશિયન કોન્સ્યુલેટ આ કેસ પર નજર રાખી રહ્યું છે. તે ગોવા પોલીસને તમામ માહિતી અને સહકાર આપશે.