એનસીપી નેતા જીતેન્દ્ર આવ્હાડ પર લાગ્યો છેડતીનો આરોપ, ધારાસભ્ય પદ છોડવાની કરી જાહેરાત

એનસીપીના નેતા અને ધારાસભ્ય જીતેન્દ્ર આવ્હાડે ધારાસભ્ય પદ છોડવાની જાહેરાત કરી છે. મરાઠી ફિલ્મના વિરોધના કેસમાં તેમની ધરપકડ કરવામાં આવી હતી. આ કેસમાં જામીન મળ્યાના થોડા સમય બાદ તેના પર એક મહિલાની છેડતીનો આરોપ લાગ્યો હતો. મહિલાનો આરોપ છે કે મુંબ્રામાં નવા બ્રિજના ઉદ્ઘાટન દરમિયાન જિતેન્દ્ર આવ્હાડે તેને અયોગ્ય રીતે સ્પર્શ કર્યો હતો. તેની ફરિયાદના આધારે મુંબ્રા પોલીસે આવ્હાડ વિરુદ્ધ ગુનો નોંધ્યો હતો.

મહિલાએ આપેલી ફરિયાદ મુજબ ઘટના 13 નવેમ્બરની છે. તે દિવસે મુંબ્રામાં એક પુલનું ઉદ્ઘાટન મુખ્યમંત્રી એકનાથ શિંદેએ કર્યું હતું. પીડિત મહિલા મુખ્યમંત્રીને મળવા આગળ વધી રહી હતી. આ દરમિયાન ધારાસભ્ય જીતેન્દ્ર આવ્હાડે તેમને સ્પર્શ કર્યો હતો. જો કે જે સમયે આ ઘટના બની તે સમયે મહિલાની સાથે અનેક લોકો મુખ્યમંત્રીને મળવા આગળ વધી રહ્યા હતા.

મહિલાના આ આરોપ બાદ જીતેન્દ્ર આવ્હાડે કહ્યું હતું કે પોલીસે 72 કલાકમાં મારી વિરુદ્ધ બે ખોટા કેસ નોંધ્યા છે. હું પોલીસની બર્બરતા સામે લડીશ. તેમણે કહ્યું કે તેઓ વિધાનસભામાંથી રાજીનામું આપવાનું વિચારી રહ્યા છે. આપણે લોકશાહીની હત્યા જોઈ શકતા નથી.

અગાઉ થાણેમાં વર્તક નગર પોલીસે મરાઠી ફિલ્મ ‘હર હર મહાદેવ’નો વિરોધ કરવા બદલ NCP ધારાસભ્ય જિતેન્દ્ર આવ્હાડની ધરપકડ કરી હતી. તેના પર સ્થાનિક થિયેટરમાં ફિલ્મ જોવા આવેલા એક વ્યક્તિ પર હુમલો કરવાનો આરોપ હતો. આ કેસમાં ધરપકડ બાદ કોર્ટે તેને જામીન આપ્યા હતા.

થાણે શહેરના એક મોલમાં મલ્ટિપ્લેક્સમાં મરાઠી ફિલ્મ ‘હર હર મહાદેવ’ના શોમાં વિક્ષેપ પાડવાના કેસમાં ધરપકડ થયા બાદ તેને જામીન આપવામાં આવ્યા હતા. આ કેસમાં તેના 11 વિરૂદ્ધ પણ કેસ નોંધવામાં આવ્યો હતો.