ઓમિક્રોન કરતા તો ‘ઓ મિત્રો’ વધારે ખતકનાક છેઃ કોંગ્રેસ નેતાએ પીએમ મોદી પર કર્યો કટાક્ષ

કોંગ્રેસ સાંસદ શશિ થરૂરે પીએમ મોદી પર પ્રહાર કરતા કહ્યું છે કે ઓમિક્રોન કરતા ઓ મિત્રો વધુ ખતરનાક છે. પીએમ મોદી હંમેશા પોતાના સંબોધનમાં મિત્રો શબ્દનો ઉપયોગ કરતા જોવા મળે છે. આ માટે હવે કોંગ્રેસ નેતાએ નિશાન સાધ્યું છે. કોંગ્રેસના વરિષ્ઠ નેતા શશિ થરૂરે સોમવારે ટ્વીટ કરીને આ વાત કહી. તેમણે ટ્વિટ કરીને કહ્યું- ઓમિક્રોન કરતા “ઓ મિત્રો” વધુ ખતરનાક છે! આપણે દરરોજ વધતા ધ્રુવીકરણ, નફરત અને ધર્માંધતાને પ્રોત્સાહન આપવા, બંધારણ પરના કપટી હુમલાઓ અને આપણી લોકશાહીને નબળી પાડવાના પરિણામોને માપી રહ્યા છીએ. આ વાયરસનું કોઈ “હળવું સંસ્કરણ” નથી.

કોંગ્રેસ પેગાસસ પર નવા ઘટસ્ફોટને લઈને સંસદમાં પ્રવેશવાની તૈયારી કરી રહી છે ત્યારે થરૂરે આ નિશાન સાધ્યું છે. કહેવામાં આવી રહ્યું છે કે થરૂર આ મુદ્દે પીએમ મોદી પર નિશાન સાધતા હતા. પેગાસસ મુદ્દે કોંગ્રેસ પાર્ટી આક્રમક રહી છે. તાજેતરના ખુલાસામાં કહેવામાં આવ્યું છે કે મોદી સરકારે ઈઝરાયેલ પાસેથી પેગાસસ ખરીદ્યું છે. આ ડીલ સમયે પીએમ મોદી પોતે ઈઝરાયેલમાં હતા. ગયા વર્ષે એક ખુલાસામાં કહેવામાં આવ્યું હતું કે કેન્દ્ર સરકાર વિપક્ષી નેતાઓ, પત્રકારો, સામાજિક કાર્યકરો પર નજર રાખવા માટે આ સ્પાયવેરનો ઉપયોગ કરી રહી છે. ત્યારે ઘણો વિવાદ થયો હતો. કોંગ્રેસે તે સમયે સંસદમાં પણ આ મુદ્દો ઉઠાવ્યો હતો. ત્યારે સરકાર વતી કહેવામાં આવ્યું હતું કે સરકારને પેગાસસ સાથે કોઈ લેવાદેવા નથી.

શશિ થરૂર છેલ્લા કેટલાક દિવસોથી સતત ભાજપ અને તેના નેતાઓ પર પ્રહારો કરી રહ્યા છે. આ પહેલા થરૂરે યુપી ચૂંટણીને લઈને સીએમ યોગી પર નિશાન સાધ્યું હતું. ત્યારબાદ તેમણે હિંદુ-મુસ્લિમ મુદ્દે ભાજપ પર પ્રહારો કર્યા હતા. કોંગ્રેસ નેતાએ ટ્વીટ કરીને કહ્યું હતું કે, તમે નથી જાણતા કે તમે આ દેશને કેટલું નુકસાન કર્યું છે, તમે સ્મશાન-ઓ-કબ્રસ્તાન કર્યું છે, ગંગા-જમની તહઝીબનું અપમાન કર્યું છે, ભાઈ-ભાઈને હિન્દુ-મુસ્લિમ બનાવ્યા છે.