ભારતના આ પાડોશી દેશે કહ્યુ, અમને મુશ્કેલીમાંથી માત્ર ભારત જ બચાવી શકે છે

ભારત શ્રીલંકાને ડિફોલ્ટર થવાથી બચાવવા માટે તેને આર્થિક મદદ કરી રહ્યું છે. ભારતમાં શ્રીલંકાના હાઈ કમિશનર મિલિન્ડા મોરાગોડાએ આ માટે ભારતનો આભાર માન્યો છે અને કહ્યું છે કે આનાથી બંને દેશો વચ્ચે વિશ્વાસ વધારવામાં મદદ મળશે. તેમણે એમ પણ કહ્યું છે કે આનાથી શ્રીલંકામાં ચીનની વધતી ગતિવિધિઓને લઈને ભારતની ચિંતા પણ સમાપ્ત થઈ જશે.

મંગળવારે ભારતે શ્રીલંકાને 500 મિલિયન ડોલરની મદદ કરી જેથી તે પેટ્રોલિયમ ઉત્પાદનો ખરીદી શકે. બીજા જ દિવસે મિલિન્દા મોરાગોડાએ આ વાતો કહી. તેમણે કહ્યું કે રાષ્ટ્રપતિ ગોટાબાયા રાજપક્ષે શ્રીલંકાની અર્થવ્યવસ્થાને સુધારવા માટે પ્રયત્નશીલ છે અને તેમાં ભારત મોટી ભૂમિકા ભજવવા જઈ રહ્યું છે.

તેમણે કહ્યું કે, વીજળી જેવા આવશ્યક ક્ષેત્રોને લઈને ભારત સાથે હંમેશા સહકાર રહ્યો છે. એકવાર આપણે આના પર કામ કરવાનું શરૂ કરી દઈએ તો બીજી ચિંતાઓ માટે કોઈ સ્થાન રહેશે નહીં. આપણે યોજના સાથે આગળ વધવું પડશે, આપણા લક્ષ્ય તરફ મક્કમ રહેવું પડશે અને બાકીનું બધું તેની જાતે જ થશે.

હાઈ કમિશનરે જણાવ્યું હતું કે પેટ્રોલિયમ અને ગેસ, પાવર, બંદરો, નિકાસ, ઉત્પાદન અને પ્રવાસન જેવા આવશ્યક ક્ષેત્રોમાં સહકારથી બંને દેશો વચ્ચેના સંબંધો મજબૂત અને અર્થપૂર્ણ રીતે આગળ વધશે.

ઘણા લોકો માને છે કે શ્રીલંકાની ડૂબતી અર્થવ્યવસ્થાનું કારણ ચીન પાસેથી લીધેલું દેવું છે, પરંતુ મિલિન્ડા મોરાગોડા આ વાતોને નકારી કાઢે છે. તેમનું કહેવું છે કે શ્રીલંકાની આ હાલત વધારે ખર્ચના કારણે થઈ છે. આ માટે કોઈ દેશને દોષ દેવાનો કોઈ અર્થ નથી. તેમણે આગળ કહ્યું, ‘મોટી વાત એ છે કે ભારત આપણી નવી અર્થવ્યવસ્થાની ચાવી છે. ભારત અમને આ સ્થિતિમાંથી બહાર આવવામાં મદદ કરશે અને અમે તમામ જરૂરી ક્ષેત્રોમાં સહયોગ વધારી શકીશું. શ્રીલંકા પર્યટન દ્વારા તેની અર્થવ્યવસ્થાને સુધારવાનો પ્રયાસ કરી રહી છે અને આ પગલામાં ભારત તેનું સૌથી મોટું બજાર છે.