પાકિસ્તાનમાં ઇમરજન્સી લાદવામાં આવે તેવી સંભાવના, ઇમરાન ખાનનો આ પ્રસ્તાવ વિપક્ષે ફગાવ્યો

પાકિસ્તાનના વડાપ્રધાન ઈમરાન ખાન ગુરુવારે ફ્લોર ટેસ્ટ પહેલા રાષ્ટ્રને સંબોધિત કરશે. આવી સ્થિતિમાં હવે ઈમરાન ખાન આમાં શું બોલશે તેના પર સૌની નજર ટકેલી છે. એવી અટકળો છે કે ઈમરાન આજના સંબોધનમાં ઈમરજન્સી લાદવા જેવા કડક પગલાં પણ લઈ શકે છે. આ દરમિયાન ઈમરાન વિરુદ્ધ વિપક્ષને બહુમતી મળવાના સમાચાર છે, મળતી માહિતી મુજબ વિપક્ષી પાર્ટીઓની બેઠકમાં 172 સાંસદોએ હાજરી આપી છે.

આવી સ્થિતિમાં અવિશ્વાસ પ્રસ્તાવ પર ચર્ચા પહેલા ચાલેલી ઈમરાન ખાનની છેલ્લી દાવ પણ નિષ્ફળ ગઈ હોય તેમ લાગી રહ્યું છે. વિપક્ષે તેમના પ્રસ્તાવને ફગાવી દીધો છે, જેમાં તેમણે વિપક્ષને સંસદ ભંગ કરવાનો પ્રસ્તાવ મૂક્યો હતો. વિપક્ષના નેતા શાહબાઝ શરીફે કહ્યું કે અમે કોઈપણ ભોગે અવિશ્વાસ પ્રસ્તાવ લાવીને ચાલુ રાખીશું.

અવિશ્વાસ પ્રસ્તાવ પર ચર્ચા પહેલા પાકિસ્તાનમાં રાજકીય હલચલ તેજ થઈ ગઈ છે. ગુરુવારે પાકિસ્તાનના વડાપ્રધાન ઈમરાન ખાને વિપક્ષને સંસદ ભંગ કરવાનો પ્રસ્તાવ મૂક્યો છે. આમ કરીને તેઓ અવિશ્વાસના પ્રસ્તાવને ટાળવા માંગે છે. સૂત્રોના જણાવ્યા અનુસાર, ઈમરાન ખાને નેશનલ એસેમ્બલીમાં વિપક્ષના નેતા શાહબાઝ શરીફને એક ‘મહત્વપૂર્ણ વ્યક્તિ’ દ્વારા સંદેશ મોકલ્યો છે.

વડાપ્રધાન ઈમરાન ખાને અવિશ્વાસ પ્રસ્તાવ પર ચર્ચા પહેલા રાષ્ટ્રીય સુરક્ષા સમિતિ (NSC)ની બેઠકની અધ્યક્ષતા કરી હતી. બીજી તરફ પાકિસ્તાનના રાજકીય ઉથલપાથલ વચ્ચે અમેરિકાએ ઈમરાનના ‘વિદેશી સત્તા’ના દાવાને ફગાવી દીધો છે. અમેરિકાએ કહ્યું છે કે તેણે પાકિસ્તાનની વર્તમાન રાજકીય પરિસ્થિતિ પર પાકિસ્તાનને કોઈ પત્ર મોકલ્યો નથી. અમેરિકાએ પણ ઈમરાન વિરુદ્ધ લાવવામાં આવેલા અવિશ્વાસ પ્રસ્તાવ પાછળ કોઈ હાથ હોવાના આરોપોને નકારી કાઢ્યા છે.