હવામાન વિભાગની આગાહી ખોટી પડતા અમારો પાક બગડે છે: ખેડૂતોએ કોર્ટ જવાની ચીમકી આપી

મધ્યપ્રદેશના એક ખેડૂત નેતાએ ભારતીય હવામાન વિભાગની ખોટી આગાહીઓ સામે કોર્ટમાં જવાની ચેતવણી આપી છે. માલવા પ્રદેશના ખેડૂત સંગઠનના નેતાએ કહ્યું છે કે હવામાન વિભાગની ખોટી આગાહીને કારણે તાજેતરના દિવસોમાં તેમના પાકને ઘણું નુકસાન થયું છે. બીજી બાજુ, એક વરિષ્ઠ હવામાનશાસ્ત્રીએ કહ્યું છે કે ખેડૂતોને ગેરમાર્ગે દોરવામાં આવ્યા છે. ભારતીય કિસાન સંઘના માલવા પ્રાંતના પ્રવક્તા ભરત સિંહ બૈસે બુધવારે દાવો કર્યો હતો કે IMD દ્વારા જારી હવામાનની આગાહી મોટાભાગના કેસોમાં નિષ્ફળ રહી છે. જેના કારણે ખેડૂતોને મોટું નુકસાન થયું છે. તેમણે કહ્યું કે તેઓ આઇએમડીની ખોટી આગાહીઓ સામે કોર્ટમાં જવાની યોજના બનાવી રહ્યા છે અને આ અંગેનો અંતિમ નિર્ણય ટૂંક સમયમાં લેવામાં આવશે.
ઉજ્જૈનના ખેડૂત નેતા બૈસે જણાવ્યું હતું કે ઘણી વખત ખેડૂતો IMD ની હવામાન આગાહી મુજબ વાવણી માટે પોતાને તૈયાર કરે છે, પરંતુ ખોટી આગાહીને કારણે તેમને મોટું નુકસાન થયું છે. તાજેતરના ભારે વરસાદનો ઉલ્લેખ કરતા તેમણે કહ્યું કે આમાં વાવેલા પાકને પણ ઘણું નુકસાન થયું છે. આવી સ્થિતિમાં ખેડૂતો IMD ની આગાહી પર ભરોસો કરી શકતા નથી. બૈસે કહ્યું કે યુએસ અને અન્ય દેશોમાં હવામાનની આગાહી સચોટ છે અને લોકો તે મુજબ પોતાની જાતને તૈયાર કરી શકે છે. તેમણે દાવો કર્યો હતો કે, “ભારત સરકાર ભારે નાણાં ખર્ચી રહી છે પરંતુ હવામાનની આગાહી ખોટી પડી રહી છે.”
બૈસે કહ્યું કે તેઓ હવામાન વિભાગની ખોટી આગાહીને કારણે રાજ્યમાં ખેડૂતોને થયેલા નુકસાનનો ડેટા એકત્ર કરી રહ્યા છે. છેલ્લા બે-ત્રણ વર્ષોની ખોટી આગાહીનો ડેટા પણ એકત્રિત કરવામાં આવી રહ્યો છે. તેમણે કહ્યું કે ડેટા સબમિટ કર્યા પછી, અમે આગામી મહિને મળનારી બેઠકમાં આ મામલે કોર્ટમાં જવાનો નિર્ણય લઈશું. અહીં, IMD ભોપાલ કેન્દ્રના એક વરિષ્ઠ વૈજ્ઞાનિકે આક્ષેપોને નકારી કાઢ્યા અને કહ્યું કે એકથી વધુ સ્રોતોમાંથી હવામાનની આગાહી ખેડૂતોને ગેરમાર્ગે દોરી શકે છે. તેમણે કહ્યું કે ખેડૂતોએ તપાસ કરવી જોઈએ કે તેમની પાસે વાસ્તવિક સ્રોતમાંથી માહિતી આવી રહી છે કે નહીં.