પાકિસ્તાનનું કબુલનામું: તાલિબાનને મદદ કરી હોવાનું ઇમરાન સરકારના મંત્રીએ સ્વીકાર્યુ, આવી રીતે કરી હતી મદદ

તાલિબાનને લઈને પાકિસ્તાન તરફથી મોટું નિવેદન બહાર આવ્યું છે. પાકિસ્તાનના ગૃહ પ્રધાન શેખ રશીદે સ્વીકાર્યું છે કે ઇસ્લામાબાદ લાંબા સમયથી તાલિબાનનો કસ્ટોડિયન છે. રશીદે કહ્યું કે અમે સંગઠનને આશ્રય આપીને તેને મજબૂત કરવા માટે કામ કર્યું, જેના પરિણામે તમે જોઈ શકો છો કે 20 વર્ષ પછી આ જૂથ ફરી એક વખત અફઘાનિસ્તાન પર શાસન કરશે. રાશિદે વધુમાં કહ્યું કે અમે પાકિસ્તાનમાં તાલિબાનોને આશ્રય, શિક્ષણ અને ઘર આપ્યા છે. અમે તેમના માટે બધું જ કર્યું છે. આ પહેલા પાકિસ્તાનના વિદેશ મંત્રી શાહ મહમૂદ કુરેશીએ 28 ઓગસ્ટના રોજ વિવાદાસ્પદ નિવેદન આપતા કહ્યું હતું કે અફઘાનિસ્તાનને ટેકો આપવા માટે ઈસ્લામાબાદ રચનાત્મક ભૂમિકા ભજવવાનું ચાલુ રાખશે.
સંયુક્ત રાષ્ટ્રના મહાસચિવ (યુએનએસજી) એન્ટોનિયો ગુટેરેસ સાથે ટેલિફોનિક વાતચીત દરમિયાન કુરેશીએ કહ્યું કે પરિસ્થિતિને સ્થિર કરવા અને અફઘાન લોકોને આર્થિક મદદ કરવા અને માનવતાવાદી સહાય ચાલુ રાખવા માટે વિશ્વ સમુદાય માટે અફઘાનિસ્તાન સાથે જોડાણ કરવું જરૂરી છે. પાકિસ્તાન અને તાલિબાન અંકુશિત અફઘાનિસ્તાનની સંભવિત ધરી ભારત માટે ચિંતાનો વિષય બની ગઈ છે. ઘણા રાજકીય વિશ્લેષકોનું કહેવું છે કે આવા વિવાદાસ્પદ નિવેદન સ્પષ્ટપણે દર્શાવે છે કે તાલિબાન શાસન હવે પાકિસ્તાન દ્વારા નિયંત્રિત થશે. એટલે કે હવે તાલિબાન પાકિસ્તાનના ઈશારે કામ કરશે. પીએમ ઇમરાન ખાનને પાકિસ્તાનમાં કથિત સલામત આશ્રયસ્થાનો વિશે પૂછવામાં આવ્યું ત્યારે તેમણે કહ્યું કે અહીં સુરક્ષિત સ્વર્ગ ક્યાં છે? પાકિસ્તાનમાં 3 મિલિયન શરણાર્થીઓ છે, જે તાલિબાન જેવા જ વંશીય જૂથમાંથી છે. તેમણે કહ્યું કે તાલિબાન લડવૈયાઓ ખૂબ હિંમતવાન છે અને વિદેશી દળોને ભગાડવા માટે બલિદાન આપ્યું છે.