કોરોના વેકસીનના બુસ્ટર ડોઝથી HIV થવાની શકયતા? જાણો વાયરલ સમાચારનું સત્ય

વૈજ્ઞાનિકોએ કોરોનાના બૂસ્ટર ડોઝથી HIVના જોખમ અંગે સોશિયલ મીડિયા પર વાયરલ થઈ રહેલા દાવાને ફગાવી દીધા છે. નિષ્ણાતો કહે છે કે આવા દાવાને સમર્થન આપવા માટે કોઈ વૈજ્ઞાનિક પુરાવા નથી. ફ્રેન્ચ વાઈરોલોજિસ્ટ લુક મોન્ટાગ્નિયર દ્વારા કરવામાં આવેલા અભ્યાસમાં સોશિયલ મીડિયા પર દાવો કરવામાં આવી રહ્યો છે કે બૂસ્ટર ડોઝથી એચઆઈવી સંક્રમણ થઈ શકે છે.

મોન્ટાગ્નિયરને એચઆઈવીની શોધ માટે 2008નું મેડિસિનનું નોબેલ પારિતોષિક મળ્યું હતું અને આ મહિનાની શરૂઆતમાં તેમનું અવસાન થયું હતું. ત્યારથી, ટ્વિટર પર લોકોએ તેને ટાંકીને પોસ્ટ્સ અપલોડ કરવાનું શરૂ કર્યું, જેમાં કહેવામાં આવી રહ્યું હતું કે જેમણે ત્રીજો ડોઝ લીધો છે તેઓએ જઈને એડ્સ માટે પરીક્ષણ કરાવવું જોઈએ. જો તમારો રિપોર્ટ પોઝિટિવ આવે તો સરકાર સામે કેસ કરો.

આ પછી કોલકાતા CSIRના વરિષ્ઠ વાઈરોલોજી સ્પેશિયાલિસ્ટ ઉપાસના રાયે કહ્યું, આપણે આવી પોસ્ટથી સાવધાન રહેવું પડશે. ગભરાવાની જરૂર નથી, આવા કોઈ વૈજ્ઞાનિક પુરાવા નથી. ઇમ્યુનોલોજિસ્ટ વિનિતા બાલ પણ સંમત થયા હતા કે કોવિડ રસીઓ કોઈપણ સ્વરૂપમાં HIV ચેપને પ્રોત્સાહન આપતી નથી.