પાકિસ્તાનની નાપાક હરકરત, ભારતીય જળસીમામાંથી ગુજરાતના સાત માછીમારોનું અપહરણ

પાકિસ્તાન તેની નાપાક હરકતોથી આખી દુનિયામાં બદનામ છે. પાકિસ્તાન મરીને ફરી એકવાર બોટ સહિત 7 ભારતીય માછીમારોનું બંદૂકની અણી પર અપહરણ કર્યું છે. આ ઘટના 28 જાન્યુઆરીની રાત્રે બની હતી. પાકિસ્તાની કોસ્ટ ગાર્ડે ભારતીય જળસીમા નજીકથી પોરબંદરની એક બોટ સહિત 7 માછીમારોનું અપહરણ કર્યું છે. ભારતીય જળસીમામાંથી તુલસી મૈયા નામની બોટને હાઇજેક કરવામાં આવી છે.

હાઇજેક કરાયેલી બોટ વત્સલ પ્રેમજી થાપાણીયાની હોવાનું બહાર આવ્યું છે. મળતી માહિતી મુજબ તુલસી મૈયા નામની બોટ ઓખાથી દરિયામાં માછલી પકડવા ગઈ હતી. જેમાં 7 માછીમારો સવાર હતા. એન્જિન ખરાબ થવાને કારણે રાત્રિ દરમિયાન દરિયાની વચ્ચે અટવાઈ ગયો હતો. જેનો ફાયદો ઉઠાવીને પાકિસ્તાન મરીને બોટ સહિત 7 ભારતીય માછીમારોનું અપહરણ કર્યું હતું. આ બોટ શુક્રવારે બપોર સુધી તેના માલિક પ્રેમજીભાઈ થાપાનિયાના સંપર્કમાં હતી અને તે પછી અચાનક સંપર્ક તૂટી ગયો હતો. તે પહેલા માછીમારોએ પાકિસ્તાની એજન્સીની બોટ આવવાની વાત કહી હતી અને ત્યારબાદ સંપર્ક તૂટી ગયો હતો.

દરિયામાં ફસાયેલી બોટમાં સવાર માછીમારોને મદદ કરવાને બદલે પાકિસ્તાન મરીન્સે તેમનું અપહરણ કર્યું હતું. નોંધનીય છે કે ગુજરાત દેશમાં સૌથી લાંબો 1600 કિમીનો દરિયાકિનારો ધરાવે છે અને તેના દરિયાકાંઠાના વિસ્તારમાં રહેતા લાખો લોકો માછીમારીના વ્યવસાય સાથે સંકળાયેલા છે. માછીમારો હંમેશા માછીમારી માટે ભારતીય સરહદમાં રહે છે. તેમ છતાં પાકિસ્તાની એજન્સી ભારતીય જળસીમામાં ઘૂસીને બોટ સહિત સ્થાનિક માછીમારોનું અપહરણ કરે છે. આજે પણ 500થી વધુ ભારતીય માછીમારો પાકિસ્તાનની જેલમાં બંધ છે. તાજેતરમાં, 20 જેટલા ભારતીય માછીમારોને પાકિસ્તાનની જેલમાંથી મુક્ત કરવામાં આવ્યા હતા, જેઓ ત્રણ-ચાર દિવસ પહેલા તેમના ઘરે પરત ફર્યા છે.