આઇસીસી ટી-20 વર્લ્ડ કપને લઇને પાકિસ્તાને કરી શરમજનક હરકત, જાણો શું છે મામલો

પાકિસ્તાન ક્રિકેટ ટીમનું શરમજનક કૃત્ય ટી 20 વર્લ્ડ કપ પહેલા સામે આવ્યું છે. પાકિસ્તાને તેની ટી 20 વર્લ્ડ કપ જર્સી પર ટુર્નામેન્ટના લોગોમાંથી ભારતનું નામ હટાવી દીધું છે. તમને જણાવી દઈએ કે ભારત 2021 ટી 20 વર્લ્ડ કપને હોસ્ટ કરી રહ્યું છે, પરંતુ કોરોના વાયરસના કારણે તેને યુએઈમાં શિફ્ટ કરવામાં આવ્યું છે. ભારત આ ટુર્નામેન્ટનું વાસ્તવિક યજમાન છે. આવી સ્થિતિમાં પાકિસ્તાને વિશ્વ સામે પોતાની જાતને શરમજનક બનાવ્યું છે. તાજેતરમાં આ ટુર્નામેન્ટમાં ભાગ લેનારી ટીમોએ પોતાની જર્સી દર્શાવવાનું શરૂ કર્યું છે. પાકિસ્તાને યજમાન દેશ ભારતનું નામ લખ્યા વગર આ જર્સી પર UAE લખ્યું છે.
આઈસીસીના નિયમો અનુસાર, આઈસીસી ટુર્નામેન્ટમાં તમામ ટીમોએ તેમની છાતીની જમણી બાજુએ ટુર્નામેન્ટના નામ સાથે યજમાન દેશનું નામ અને વર્ષ લખવું જરૂરી છે. આ અર્થમાં, ‘આઈસીસી મેન્સ ટી 20 વર્લ્ડ કપ ઈન્ડિયા 2021’ અહીં લખવાનું હતું, પરંતુ પાકિસ્તાને અહીં ભારતને બદલે યુએઈ લખ્યું છે. જો કે પાકિસ્તાને હજુ સુધી સત્તાવાર રીતે તેની વર્લ્ડ કપ જર્સી પ્રદર્શિત કરી નથી, પરંતુ જો તે જ જર્સી દર્શાવે છે, તો BCCI અને ICC તેની સામે કાર્યવાહી કરી શકે છે. આગામી ટી 20 વર્લ્ડ કપ માટે બિનસત્તાવાર રીતે સોશિયલ મીડિયા પર પાકિસ્તાનની જર્સી પ્રદર્શિત કરવામાં આવી રહી છે. તેના પર ભારતને બદલે UAE લખેલું છે.
તેના કારણે પાકિસ્તાનના આ ઘૃણાસ્પદ કૃત્ય અંગે સોશિયલ મીડિયા પર ચર્ચાઓ થઈ રહી છે. હવે તે જોવું રસપ્રદ રહેશે કે શું પાકિસ્તાન ક્રિકેટ બોર્ડ સુપર 12 ની શરૂઆત પહેલા આ મામલે કોઈ સત્તાવાર કાર્યવાહી કરે છે કે ફેરફાર કરે છે. ભારત અને પાકિસ્તાનની ટીમો 24 ઓક્ટોબરે દુબઈ ઈન્ટરનેશનલ સ્ટેડિયમમાં એકબીજા સામે ટકરાશે. 2 વર્ષ બાદ બંને ફરી એક વખત ICC ટુર્નામેન્ટમાં સામ -સામે થશે.