સૌરવ ગાંગુલી વિરાટ કોહલીને શોકોઝ નોટિસ આપવા માંગતો હતો? જાણો શું છે આના પાછળનું સત્ય

BCCI પ્રમુખ સૌરવ ગાંગુલીએ એવા અહેવાલોને રદિયો આપ્યો છે કે તેઓ તેમના એક નિવેદનને કારણે દક્ષિણ આફ્રિકાના ભારત પ્રવાસ પહેલા પૂર્વ ભારતીય કેપ્ટન વિરાટ કોહલીને કારણદર્શક નોટિસ મોકલવા માંગે છે. ગાંગુલીએ ન્યૂઝ એજન્સીને કહ્યું કે તેમના વિશે ચાલી રહેલા સમાચાર સાચા નથી.

એક દિવસ પહેલા જ મીડિયા રિપોર્ટ્સમાં દાવો કરવામાં આવ્યો હતો કે દક્ષિણ આફ્રિકા પ્રવાસ પર રવાના થતા પહેલા વિરાટ કોહલીને ODI કેપ્ટન પદ પરથી હટાવવા અંગે પ્રેસ કોન્ફરન્સમાં આપેલા નિવેદનથી સૌરવ ગાંગુલી નારાજ છે. વાસ્તવમાં આ પ્રેસ કોન્ફરન્સમાં પૂર્વ ભારતીય કેપ્ટન કોહલીએ પોતાના એક નિવેદન દ્વારા BCCI પ્રમુખ અને અધિકારીઓને એક રીતે ખોટા સાબિત કર્યા હતા.

દક્ષિણ આફ્રિકાના પ્રવાસે જતા પહેલા BCCIએ એક પ્રેસ રિલીઝ જાહેર કરીને અચાનક જ રોહિત શર્માને T20 પછી વિરાટ કોહલીને બદલે ODIનો કેપ્ટન બનાવવાની જાણકારી આપી હતી. ત્યારબાદ ગાંગુલીએ આના પર કહ્યું, BCCI અને પસંદગીકારોએ સાથે મળીને આ નિર્ણય લીધો છે. BCCIએ વિરાટને વિનંતી કરી હતી કે તે T20 ની કેપ્ટનશીપ ન છોડે. પરંતુ તે તેના માટે સંમત ન હતો. મેં પોતે પ્રમુખ તરીકે તેમની સાથે વાત કરી હતી. પરંતુ ટી-20ની કેપ્ટન્સી છોડવાનો નિર્ણય લીધો હતો. આવી સ્થિતિમાં પસંદગીકારોને સફેદ બોલ ક્રિકેટમાં એક જ કેપ્ટન જોઈતો હતો. તેથી જ આ જવાબદારી રોહિતને સોંપવામાં આવી હતી.

સૌરવ ગાંગુલીના આ નિવેદનને વિરાટ કોહલીએ દક્ષિણ આફ્રિકાના પ્રવાસે રવાના થયા બાદ એક પ્રેસ કોન્ફરન્સમાં એમ કહીને ખોટું સાબિત કર્યું હતું કે બોર્ડના કોઈપણ અધિકારીએ ક્યારેય ટી-20 ટીમની કેપ્ટનશીપ ન છોડવા અંગે તેમની સાથે વાત કરી નથી. આટલું જ નહીં, તેણે વનડેની કેપ્ટનશીપથી હટાવવા અંગે પણ ચોંકાવનારી વાત કરી હતી. કોહલીએ કહ્યું હતું કે, દક્ષિણ આફ્રિકા સામેની ટેસ્ટ શ્રેણીની પસંદગી કરવા માટે પસંદગી સમિતિની બેઠક થઈ હતી. આ મીટિંગના દોઢ કલાક પહેલા પસંદગીકારોએ મને ODIની કેપ્ટનશીપથી હટાવવાની વાત કહી હતી. આ પહેલા મારી સાથે આ વિષય પર કોઈએ વાત કરી ન હતી. મને કહ્યું કે પાંચેય પસંદગીકારોએ નિર્ણય લીધો છે કે હું હવે વનડેનો કેપ્ટન નહીં રહીશ.