સુરતના યુવાને વલસાડના વૃદ્ધનો એટીએમ કાર્ડ મેળવી 3 લાખથી વધુની ચોરી કરી, જાણો આખો મામલો

વલસાડના ગુંદલાવમાં રહેતા એક રહિશે પોતાના સુરતમાં રહેતા પડોશી યુવાન પર વિશ્વાસ રાખીને એટીએમ કાર્ડ આપ્યું હતું. જો કે યુવાને તેનો દુરૂપયોગ કરીને 7 મહિનાની અંદર વૃદ્ધનું એકાઉન્ટ ખાલી કરી નાખ્યું હતું. પોતાના ખાતામાંથી એટીએમ થકી પૈસા ઉપાડવાને લઇને છેતરાયેલા વૃદ્ધે વલસાડ પોલીસમાં ફરિયાદ કરી હતી. વલસાડ સાયબર પોલીસે યુવાનની ધરપકડ કરીને પુછપરછ શરૂ કરી છે. મળતી માહિતી મુજબ, વલસાડના ગુંદલાવમાં રહેતા ગોરધનભાઇ રાઠોડ વલસાડ રહેવા આવ્યા તે પહેલા સુરતમાં રહેતા હતા. તેની પડોશમાં કૃણાલ વસંત પવાર નામનો એક યુવક રહેતો હતો. ગોરધનભાઇને કાર્ડ વાપરતા આવડતું ન હોવાથી તેમણે પૈસાની જરૂર હોય પૈસા ઉપાડવા માટે કાર્ડ કૃણાલ પવારને આપ્યું હતું.
યુવાને ચાલાકી દાખવી વૃદ્ધને છેતરવાનો કારસો રચ્યો હતો. એટીએમ કાર્ડ અને તેની પીન વડે વસંતે પહેલા તો ડમી પેટીએમ વોલેટ એકાઉન્ટ બનાવી દીધું હતુ અને ધીમે ધીમે તેમાં પૈસા ટ્રાન્સફર કરવાની શરૂઆત કરી દીધી હતી. પહેલા થોડા થોડા પૈસા ટ્રાન્સફર કર્યા બાદ તેનો તેનો ધીરે ધીરે લોભ વધતો ગયો અને તેણે ધીરે ધીરે ગોરધનભાઇના ખાતામાંથી રૂ. 3.23 લાખની રકમ ઉપાડી લીધી. અને આમ બેંક એકાઉન્ટ ખાલી કરી દીધું હતુ. એકાઉન્ટ ખાલી થઇ જતાં ગોરધનભાઇએ વલસાડ સાઇબર ક્રાઇમમાં ફરિયાદ કરી હતી. કૃણાલે જ તેની સાથે ઠગાઇ કરી પૈસા ઉપાડી લીધા હોવાનું બહાર આવતા પોલીસે કૃણાલને પકડી પાડ્યો હતો. કૃણાલે આ પૈસા જુગારમાં તેમજ અન્ય મોજશોખમાં ખર્ચી કાઢ્યા હોવાનો ખુલાસો થયો છે.