ગુજરાતના આ જિલ્લામાં કારખાનામાં ભયંકર વિસ્ફોટ, નવ જેટલા કામગારો દાઝયા

ગુજરાતના ભાવનગર જિલ્લામાં મધરાતના સુમારે એક કારખાનામાં જોરદાર વિસ્ફોટ થયો હતો. પોલીસે રવિવારે જણાવ્યું કે વિસ્ફોટમાં નવ કર્મચારીઓ ઘાયલ થયા છે, જેમને હોસ્પિટલમાં દાખલ કરવામાં આવ્યા છે. સિહોર પોલીસ સ્ટેશનના અધિકારીએ જણાવ્યું કે રાજધાની ગાંધીનગરથી લગભગ 200 કિમી દૂર સિહોરમાં અરિહંત ફર્નેસ રોલિંગ મિલ આવેલી છે. કારખાનામાં રાત્રી દરમિયાન કામદારો કામ કરી રહ્યા હતા. અચાનક એક વિસ્ફોટ થયો. કારખાનાના નવ કામદારો દાઝી જતાં તેઓને ભાવનગરની સરકારી હોસ્પિટલમાં લઈ જવાયા હતા.

વિસ્ફોટનું ચોક્કસ કારણ જાણવાના પ્રયાસો ચાલુ છે, એમ પોલીસ અધિકારીએ જણાવ્યું હતું. ગુજરાતમાં એક પછી એક કારખાનાઓમાં વિસ્ફોટના અહેવાલો છે. 16મી ડિસેમ્બરના રોજ પંચમહાલ જિલ્લામાં ગુજરાત ફ્લોરોકેમિકલ્સ લિ. ફેક્ટરીમાં આગ બાદ થયેલા વિસ્ફોટમાં સાત લોકોના મોત થયા હતા અને 30થી વધુ લોકો ઘાયલ થયા હતા. ડિસેમ્બરમાં જ વડોદરામાં કેમિકલ ફેક્ટરીમાં બોઈલર ફાટતાં ચાર વર્ષની બાળકી સહિત ચાર લોકોના મોત થયા હતા અને 11 લોકો ઘાયલ થયા હતા. આ વિસ્ફોટ એટલો જોરદાર હતો કે તેની અસર બે કિમી દૂર સુધી અનુભવાઈ હતી. અન્ય ઘણી જગ્યાએ ફેક્ટરીઓમાં વિસ્ફોટના અહેવાલો છે.

અમદાવાદ અને તેની આસપાસના આવા 5 હજારથી વધુ ઉદ્યોગો છે, જે છેલ્લા સાત મહિનાથી ફાયર એનઓસી વિના કાર્યરત છે. કારણ એ છે કે શહેરી વિકાસ વિભાગે જુલાઈ 2021માં મ્યુનિસિપલ કોર્પોરેશનો અને નગરપાલિકાઓ પાસેથી ફાયર સેફ્ટી NOC આપવાનો અધિકાર છીનવી લીધો હતો. ત્યારપછી કોઈ નવી ઓથોરિટીની નિમણૂક કરવામાં આવી નથી. જેના કારણે કારખાનાઓમાં કામ કરતા લોકોના જીવ જોખમમાં મુકાયા છે, માલિકો માટે આયાત-નિકાસ લાયસન્સ પણ જોખમમાં મુકાયા છે.