આ ઑસ્ટ્રેલિયન દિગ્ગજે કોલકાત્તા નાઈટ રાઈડર્સને આપ્યો મોટો ઝટકો, આગામી સિઝન રમવાથી કર્યો ઇનકાર

T20 વર્લ્ડ કપ પૂરો થયા બાદ ભારતીય ક્રિકેટમાં ઈન્ડિયન પ્રીમિયર લીગ (IPL)ની તૈયારીઓ શરૂ થઈ ગઈ છે. આવતા વર્ષે એટલે કે 2023માં યોજાનારી 15મી સિઝન માટે 23 ડિસેમ્બરે કોચીમાં મિની હરાજી યોજાશે. આ માટે, IPLની સંચાલક મંડળે ટીમમાં કોઈપણ ફેરફાર (રિટેન્શન અથવા રિલીઝ) કરવા માટે ફ્રેન્ચાઇઝીઓને 15 નવેમ્બર સુધીનો સમય આપ્યો છે, જે આજે સમાપ્ત થાય છે. દરમિયાન કોલકાતા નાઈટ રાઈડર્સ (KKR)ને મોટો આંચકો લાગ્યો છે.

બે વખતના ચેમ્પિયન KKRના મોંઘા ફાસ્ટ બોલર પેટ કમિન્સે આવતા વર્ષની IPLમાંથી ખસી જવાનો નિર્ણય લીધો છે. ઓસ્ટ્રેલિયન ફાસ્ટ બોલરે પોતાના સત્તાવાર ટ્વિટર એકાઉન્ટ પરથી ટ્વીટ કરીને પોતાના નિર્ણયની જાણકારી આપી હતી. કમિન્સે પોતાની પોસ્ટમાં આઈપીએલમાંથી ખસી જવા પાછળ આંતરરાષ્ટ્રીય ક્રિકેટ અને દેશ માટે રમવાની પ્રતિબદ્ધતા વિશે વાત કરી છે.

કમિન્સે પોતાના ટ્વીટમાં કહ્યું કે આવતા વર્ષે IPLમાંથી ખસી જવાનો મેં મુશ્કેલ નિર્ણય લીધો છે. તેણે કહ્યું કે આગામી 12 મહિનાની વનડે અને ટેસ્ટ સિરીઝમાં ઇન્ટરનેશનલ શેડ્યૂલ ખૂબ જ વ્યસ્ત રહેવાનું છે, તેથી હું એશિઝ સિરીઝ અને વનડે વર્લ્ડ કપ પહેલા આરામ આપવા માંગુ છું. કમિન્સે પણ પોતાની પોસ્ટમાં KKRનો આભાર વ્યક્ત કર્યો હતો અને ટૂંક સમયમાં પરત ફરવાની આશા પણ વ્યક્ત કરી હતી.

નોંધપાત્ર વાત એ છે કે કમિન્સ ઓસ્ટ્રેલિયાની ટેસ્ટ અને વનડે બંને ટીમનો કેપ્ટન છે. એરોન ફિન્ચની નિવૃત્તિ બાદ તેને તાજેતરમાં જ ODI ટીમની કમાન પણ સોંપવામાં આવી છે. કમિન્સને KKR દ્વારા આ વર્ષની મેગા ઓક્શનમાં રૂ. 7.25 કરોડની મોટી રકમ ખર્ચીને સામેલ કરવામાં આવ્યો હતો. કમિન્સે 5 મેચ રમી અને 7 વિકેટ લીધી હતી. આ સિવાય તેણે બેટથી અડધી સદી પણ ફટકારી હતી. તેણે મુંબઈ ઈન્ડિયન્સ સામે માત્ર 14 બોલમાં લીગની સૌથી ઝડપી અર્ધશતક ફટકારવાના KL રાહુલના રેકોર્ડની પણ બરાબરી કરી હતી.