કીમ પાસેનો ફાટક 31મી સુધી રહેશે બંધ, વિકલ્પ આપતુ જાહેરનામુ

સુરત જિલ્લામાં કીમ માંડવી વચ્ચે કીમ ગામમાં ઓવરબ્રિજના કામને લઈને આગામી 31મી મે સુધી કીમની રેલવે ફાટકને બંધ કરવાનો નિર્ણય કરાયો છે. જેથી આ ક્રોસીંગ પરથી હવે વાહનોની અવરજવર 10 દિવસ સુધી અટકી જશે. સુરત જિલ્લાના અધિક જિલ્લા મેજીસ્ટ્રેટ એસ.ડી.વસાવાએ પ્રસિદ્ધ કરેલા જાહેરનામામાં આ વિશે ઉલ્લેખ કરાયો છે. જાહેરનામા મુજબ સુરત જિલ્લામાં માર્ગ અને મકાન વિભાગના કાર્યપાલક ઈજનેર હસ્તકના સાહોલ-કીમ-માંડવી રોડ પર કીમ ગામમાં રેલવે ફાટક આવેલી છે. આ ક્રોસીંગ પરથી દરરોજ હજારો વાહનો પસાર થાય છે. પરંતુ સાયણથી કીમ સ્ટેશન વચ્ચે આવેલી આ એલ.સી. નં.158 ઉપર આર.ઓ.બી.નું કામ શરૃ થનાર છે.
જેથી આ રસ્તા પરથી બન્ને તરફના વાહનોને તા.31/5/2021 સુધી પસાર થવા કરવા પર પ્રતિબંધ રહેશે. વાહનચાલકોને આ ક્રોસીંગના વિકલ્પ તરીકે ને.હા.નં.48 થી આંબોલી થઈને કઠોર-વેલંજા-સાયણ-સાંધિયેર-ઓલપાડ-માસમા-સરોલી- સુરતનો રૂટ અપાયો છે. આ ઉપરાંત જો કોઈ વાહનચાલકોને પહેલો વિકલ્પ પસંદ ન હોય તો તેઓ બીજા વિકલ્પનો ઉપયોગ કરી શકશે. જેમાં અન્ય વિકલ્પ તરીકે અંકલેશ્વર તથા આજુબાજુથી આવતા વાહનો ને.હા.નં.48થી કોસંબા ચોકડીથી કોસંબા-ખરચ-પાંજરોલી-ઓભા-સાહોલ-કદરામા-ઓલપાડ-માસમા-સરોલી થઈને સુરતમાં પ્રવેશ કરી શકશે. આ જાહેનામાની નોંધ લેવા જિલ્લા મેજિસ્ટ્રેટ વસાવાએ વાહનચાલકોને અપીલ કરી છે. અધિકારીના આ નિર્ણયથી આગામી 10 દિવસ સુધી વાહનચાલકોને મુશ્કેલીમાં મુકાવવું પડશે.