ડાંગની આદિવાસી બહેનોએ આત્મનિર્ભરતાની એકી મિશાલ આપી કે તેમની પ્રાકૃતિક રાખડીની દેશભરમાંથી ડિમાન્ડ આવવા લાગી

ભાઈ-બહેનના પ્રેમનું પ્રતીક એટલે રક્ષાબંધન. આ દિવસે બહેન તેના ભાઈને રાખડી બાંધી બહેનની રક્ષાના બંધનમાં જીવનભરની ગાંઠ બાંધવાના પર્વને રક્ષાબંધન કહેવામાં આવે છે. ફાગણ સુદ પૂનમના દિવસે આ તહેવાર દરેક ભાઈ બહેન ધામધૂમ પૂર્વક ઉજવતા હોય છે અને આ તહેવારના દિવસે દરેક બહેન પોતાના ભાઈના હાથ રાખડી બાંધી ઉજવતી હોય છે. ત્યારે કેટલીક બહેનો આ વર્ષે અનોખી રાખડી એટલે કે વાંસમાંથી બનાવેલી રાખડી પોતાના ભાઈના હાથ ઉપર બાંધીને આ પવિત્ર રક્ષાબંધનના તહેવારની ઉજવણી કરતી જોવા મળશે.
ભાઈ બહેન માટે પ્યારનો પવિત્ર તહેવાર રક્ષાબંધનને હવે ગણતરીના દિવસો બાકી છે ત્યારે બજારમાં રાખડીની રંગબેરંગી અને જુદી જુદી ડિઝાઈન ઉપલબ્ધ છે પરંતુ આ વખતે ગુજરાતના ડાંગ જિલ્લાની આદિવાસી મહિલાઓએ બનાવેલી રાખડી પ્રશંસનીય છે. ડાંગ જિલ્લાની આદિવાસી મહિલાઓએ ઈકો ફ્રેન્ડલી રાખી બનાવી છે. ખરેખર ડાંગ જિલ્લો ૧૦૦% આદિવાસી વસ્તી ધરાવતો જિલ્લો છે. અહીં આદિવાસી સમાજના લોકો કાં તો પરંપરાગત ખેતી કરે છે અથવા મજૂરી કરે છે. પરંતુ અહીંનો કોટવાળીયા સમાજ વાંસ માંથી ટોપલા ટોપલી બનાવતા હોય છે તો કેટલાક લોકો રોજીરોટી ન મળવાને કારણે સ્થળાંતર પણ કરી જતા હોય છે. ત્યારે એક ખાનગી સંસ્થા તેમને રોજગારીની નવી તકો પૂરી પાડવા તેમજ તેમને આત્મનિર્ભર બનાવવા માટે આવી છે. તેમને હજારો રાખડીઓ બનાવવાનો આદેશ આપવામાં આવ્યો છે.
આદિવાસી મહિલાઓ પણ વાંસમાંથી એટલે કે જંગલમાંથી મળતા વાંસમાંથી રાખડીઓ બનાવી રહી છે. વાંસમાંથી વિવિધ પ્રકારની રાખડીઓ બનાવવાની મહિલાઓને તાલીમ આપીને રોજગારીને પ્રોત્સાહન આપવામાં આવ્યું છે. આ દિવસોમાં ડાંગની આદિવાસી મહિલાઓનું એક જૂથ અલગ અલગ પ્રકારની રાખડીઓ બનાવીને તેને સમગ્ર દેશમાં મોકલી રહ્યું છે. આ રાખડીની કિંમત ૫૦ થી ૨૦૦ રૂપિયા રાખવામાં આવી છે.આ વર્ષે ૪ મહિલાઓએ ૫૦૦૦ જેટલી રાખડીઓ બનાવીને દેશના વિવિધ શહેરોમાં મોકલી છે. રાખડી બનાવવાની ટ્રેનિંગ આપનાર અંકિત મલિકે જણાવ્યું હતું કે ડાંગ ની આ મહિલાઓ વાંસમાંથી ટોપલા ટોપલી બનાવીને જે આવક મેળવે છે એના કરતા વધારે આવક રાખડી બનાવીને મેળવતી થઈ છે ત્યારે હવે આવનાર સમયમાં હજુ પણ ઘણી મહિલાઓ આ રાખડીના ઉત્પાદનના વ્યવસાય માં જોડાઈને આત્મનિર્ભર બને તો નવાઈ નહિ.