શહેરની બજારોમાં દિવાળીની ઘરાકી નિકળતા વેપારીઓમાં હર્ષ વ્યાપ્યો છે .

રોશનીના પર્વસમુહ દિપાવલીના મહાપર્વ આડે હવે ગણતરીના આઠેક દિવસ બાકી રહ્યા છે ત્યારે શહેરની મોટા ભાગની બજારોમાં મોડી સાંજ સુધી ખરીદી જામતા વેપારીઓમાં હર્ષ વ્યાપેલ છે. પગાર અને બોનસની ચૂકવણી થઈ રહી હોય ખાનગી એકમોના નોકરીયાતો ઉપરાંત ગૃહિણીઓ દ્વારા આવશ્યક ચીજવસ્તુઓની ધૂમ ખરીદી થઈ રહી છે જેથી બજારોમાં ખરીદીના કરંટની અનુભૂતિ થઈ રહી છે. પ્રકાશના મહાપર્વ દિવાળીનો તહેવાર ઢુંકડો આવી પહોંચતા ભાવનગર શહેર અને જિલ્લાના તાલુકા મથકોમાં સ્થાનિક તેમજ આસપાસના ગ્રામ્ય વિસ્તારોમાંથી છુટક ખરીદી કરવા માટે આવતા મોટા ભાગની બજારો ગ્રાહકોથી ધમધમવા લાગી છે તેથી શહેરના હાર્દસમા પિરછલ્લા શેરી, વોરાબજાર, એમ.જી. રોડ, નાણાવટી બજાર, દિવાનપરા રોડ, ગોળબજાર, હેરીસ રોડ, આંબાચોક સહિતના વિસ્તારોમાં સ્થાનિક તેમજ બહારગામથી ખરીદી અર્થે આવતા ગ્રાહકો દ્વારા સાંજના અરસામાં તેમનું વાહન કયા પાર્ક કરવુ તેની દ્વિધામાં રહે છે.અનેક સ્થળોએ વાહનચાલકો દ્વારા આડેધડ વાહન પાર્ક કરાતા હોય રાહદારીઓ માટેના રસ્તાઓ જાણે કે, સાંકડા બની જવા પામે છે.શહેરની પીરછલ્લા શેરી અને વોરાબજારમાં તો દરરોજ બપોરથી મોડી સાંજ સુધી માનવ મહેરામણ ઉમટી પડતો હોય છે અને બજારોમાં ગ્રાહકોની ભારે ચહલ-પહલ જોવા મળી રહી છે. સ્થાનિક બજારોમાં સવારના અરસામાં નજીકના ગામડાઓમાંથી અને સાંજે મોટા ભાગે શહેરી વિસ્તારોના ગ્રાહકો મહત્તમ હોય છે. જેમ જેમ દિવાળી નજીક આવી રહી છે તેમ તેમ ખરીદી માટે બજારોમાં ઘસારો વધતો જશે તેમ જણાય છે. પ્રારંભિક તબકકામાં ગ્રાહકો દ્વારા રેડીમેડ કપડા, કોસ્મેટીક, ફૂટવેર, ચિલ્ડ્રન વેર, ગૃહ સુશોભન અને શણગાર તેમજ ઈલેકટ્રોનીકસ ઉપકરણો, વાહન, મનોરંજનના સાધનો, મોબાઈલ, રંગોળી, ફટાકડા, મુખવાસ તેમજ ચીરોડી સહિતની ચીજવસ્તુઓની ધૂમ ખરીદી થઈ રહી છે.શહેરની બજારોમાં જ નહિ પણ મોટા ભાગના મોલ, બ્રાન્ડેડ કંપનીઓના શોરૂમમાં પણ ગ્રાહકોની સારી એવી ભીડ દ્રશ્યમાન થઈ રહી છે. કોરોનાની મહામારી હળવી થતા જનજીવન રાબેતા મુજબ થયેલ છે ત્યારે ગોહિલવાડના હોલસેલ અને રીટેઈલ માર્કેટમાં ઘરાકી જણાઈ રહી છે.