આ બેંકે લોન મોંઘી કરી, EMIમાં થશે ધરખમ વધારો, જાણો નવા દરો

RBIએ 7 ડિસેમ્બરે રેપો રેટમાં 0.35 ટકાના વધારાની જાહેરાત કરી હતી. રેપો રેટમાં વધારો કર્યા પછી, બેંકોએ માર્જિનલ કોસ્ટ આધારિત લેન્ડિંગ રેટ એટલે કે MCLR વધારવાનું શરૂ કર્યું છે. હવે ખાનગી ક્ષેત્રની એક્સિસ બેંકે તેના ગ્રાહકોને મોટો ઝટકો આપ્યો છે. એક્સિસ બેંકે વિવિધ સમયગાળા માટે MCLRમાં 0.30 ટકાનો વધારો કર્યો છે. હવે બેંકમાંથી લોન લેવી મોંઘી થશે. બેંકના નવા દર 17 ડિસેમ્બર, 2022થી લાગુ થશે.

નોટિસ અનુસાર, બેંકે એક વર્ષનો MCLR 0.30 ટકા વધારીને 8.75 ટકા કર્યો છે. અત્યાર સુધી તે 8.45 ટકા હતો. 2-વર્ષ અને 3-વર્ષનો MCLR હવે અનુક્રમે 8.55 ટકા અને 8.60 ટકા છે. ત્રણ મહિનાનો MCLR 0.30 ટકા વધારીને 8.65 ટકા કરવામાં આવ્યો છે. 6 મહિનાનો MCLR વધારીને 8.70 ટકા અને એક દિવસનો MCLR વધારીને 8.55 ટકા કરવામાં આવ્યો છે.

MCLRમાં વધારા સાથે ટર્મ લોન પર EMI વધવાની ધારણા છે. મોટાભાગની ગ્રાહક લોન એક વર્ષના માર્જિનલ કોસ્ટ આધારિત ધિરાણ દર પર આધારિત હોય છે. આવી સ્થિતિમાં MCLR વધવાથી પર્સનલ લોન, ઓટો અને હોમ લોન મોંઘી થઈ શકે છે.

MCLR એ ભારતીય રિઝર્વ બેંક દ્વારા વિકસિત એક પદ્ધતિ છે, જેના આધારે બેંકો લોન માટે વ્યાજ દર નક્કી કરે છે. તે પહેલા તમામ બેંકો માત્ર બેઝ રેટના આધારે ગ્રાહકો માટે વ્યાજ દર નક્કી કરતી હતી.