આઇપીએલમાં અમદાવાદની ટીમનું નામ શું હશે? સામે આવ્યું નવું અપડેટ

અમદાવાદ અને લખનૌએ ઈન્ડિયન પ્રીમિયર લીગ (આઈપીએલ)માં પોતાની ડેબ્યૂ સિઝનની તૈયારીઓ શરૂ કરી દીધી છે. લખનૌ તેના ચાહકોને તેની ટીમનું નામ સૂચવવા માટે કહી રહ્યું છે, તેથી અમદાવાદે પણ તેની ટીમનું નામ નક્કી કરવા માટે એક યોજના તૈયાર કરી છે. અમદાવાદે તેની ટીમનું નામ પસંદ કરવા માટે કેટલીક ક્રિએટિવ એજન્સીઓનો સંપર્ક કર્યો છે. બંને શહેરો પ્રથમ વખત IPLમાં પ્રતિનિધિત્વ કરશે.

મીડિયા રિપોર્ટ્સ અનુસાર, અમદાવાદે પોતાની ટીમના નામની પસંદગી માટે કેટલીક ક્રિએટિવ એજન્સીઓનો સંપર્ક કર્યો છે. અમદાવાદ સીવીસી કેપિટલ્સની માલિકીનું છે. BCCI તરફથી લીલી ઝંડી મળતાં અમદાવાદે તમામ તૈયારીઓ શરૂ કરી દીધી છે. તેણે એજન્સીઓને ગુજરાત રાજ્યની સંસ્કૃતિ અને યુવાનોના આધારે ટીમનું નામ સૂચવવા જણાવ્યું છે. આ જ તર્જ પર ટીમ હાર્દિક પંડ્યાને કેપ્ટન બનાવી શકે છે.

મીડિયા રિપોર્ટ્સ અનુસાર, અમદાવાદમાં હાર્દિક પંડ્યા, રાશિદ ખાન અને શુભમન ગિલનો ઉમેરો થયો છે અને તેની ઔપચારિક જાહેરાત થવાની બાકી છે. અમદાવાદે ટીમનું નામ આપવા માટે વેક્ટર નામની ક્રિએટિવ એજન્સીની મદદ લીધી છે. બીજી તરફ, લખનૌએ સોશિયલ મીડિયા દ્વારા તેના ચાહકોને ટીમનું નામ પસંદ કરવા કહ્યું છે. અગાઉ ગુજરાત લાયન્સ IPLમાં 2 સિઝન રમી ચૂકી છે, આ ટીમ રાજકોટ શહેર પર આધારિત હતી.

આ સાથે અમદાવાદ ભૂતપૂર્વ ઇંગ્લિશ બેટ્સમેન વિક્રમ સોલંકીને તેના ડિરેક્ટર ઓફ ક્રિકેટ ઓપરેશન્સ તરીકે નિયુક્ત કરી શકે છે. વિક્રમ સોલંકીએ ઈંગ્લેન્ડ માટે 51 ODI અને 3 T20 રમી છે. મીડિયા રિપોર્ટ્સ અનુસાર, અમદાવાદ ફ્રેન્ચાઇઝીએ ભારતીય ફાસ્ટ બોલર આશિષ નેહરાને કોચ તરીકે નિયુક્ત કરવાનું મન બનાવી લીધું છે.