વોશિંગ્ટન ડીસીમાં આવેલા બીજા વિશ્વયુદ્ધના સ્મારક (World War II Memorial) પર ડાન્સ કરવાનો વીડિયો વાયરલ થયા બાદ ભારતીય મૂળના વ્યક્તિ મધુ રાજુએ તેના સોશિયલ મીડિયા એકાઉન્ટ્સ ડિલીટ કરી દીધા છે. આ વીડિયોને કારણે ઓનલાઇન ભારે આક્રોશ જોવા મળ્યો છે અને અમેરિકામાં તેના ઇમિગ્રેશન સ્ટેટસ પર પણ જોખમ ઊભું થયું છે.
અમેરિકામાં રહેતા આ ભારતીય મૂળના વ્યક્તિને હવે દેશનિકાલ (Deportation) નો સામનો કરવો પડી શકે છે. વોશિંગ્ટન ડીસીના રાષ્ટ્રીય સ્મારક પર ડાન્સ કરવાના વીડિયોની સોશિયલ મીડિયા પર વ્યાપક ટીકા થઈ રહી છે અને આ બાબતે અમેરિકી સત્તાધીશોનું ધ્યાન પણ ખેંચ્યું છે.
સોશિયલ મીડિયા પર મધુ રાજુ તરીકે ઓળખાયેલો આ વ્યક્તિ બિન-ઇમિગ્રન્ટ વિઝા (non-immigrant visa) પર અમેરિકામાં રહેતો હોવાનું મનાય છે. ટિકટોક પર મૂળરૂપે પોસ્ટ કરવામાં આવેલી આ ક્લિપમાં તે નેશનલ મોલ ખાતેના બીજા વિશ્વયુદ્ધના સ્મારક પર એક મહિલા સાથે ડાન્સ કરતો જોવા મળે છે. જોકે, તે મહિલાની ઓળખ અંગે હજુ સુધી કોઈ વિગતો સામે આવી નથી.
