Gujarat : ગુજરાતમાં સાબરમતી રિવરફ્રન્ટ ડેવલપમેન્ટ પ્રોજેક્ટ હેઠળ અમદાવાદ મ્યુનિસિપલ કોર્પોરેશન એક પછી એક નવા આકર્ષણોનું નિર્માણ કરી રહી છે. 250 કરોડના ખર્ચે અત્યાધુનિક એમ્યુઝમેન્ટ પાર્ક બનાવવાનો નિર્ણય લેવામાં આવ્યો છે. હવે, રિવરફ્રન્ટના પશ્ચિમ કિનારે NIDની પાછળ 7,000 ચોરસ મીટર વિસ્તારમાં આશરે રૂ. 22 કરોડના ખર્ચે એક અનોખો બગીચો બનાવવાનું આયોજન કરવામાં આવ્યું છે. કાચનો વિશાળ ડોમ બનાવવામાં આવશે.
એલિવેટેડ રેમ્પ પાર્કનું મુખ્ય આકર્ષણ બનશે.
સૌથી મોટું આકર્ષણ ડોમમાં બનાવવામાં આવનાર એલિવેટેડ રેમ્પ હશે, જેના પરથી મુલાકાતીઓ અને પ્રવાસીઓએ પસાર થવું પડશે. રેમ્પની નીચે અને આજુબાજુ વિવિધ વૃક્ષો વડે ગાઢ જંગલનું વાતાવરણ બનાવવામાં આવશે. આ ગ્લાસ ડોમ ગાર્ડન એન્જિનિયરિંગની દૃષ્ટિએ પણ અનોખો હશે. આખું માળખું થાંભલા વગરનું હોવાથી વરસાદી પાણીની મદદથી વૃક્ષોને પાણી આપવા અને સમગ્ર ગુંબજને વાતાનુકૂલિત રાખવા ટેકનોલોજીનો ઉપયોગ કરવામાં આવશે.
AMC દ્વારા બનાવેલા પ્લાન મુજબ બગીચાની વિશેષતાઓ વિશે વાત કરીએ તો, ગાર્ડનને વિશાળ કાચના ડોમમાં બનાવવામાં આવશે. જેમાં ગ્રીન એનર્જી, સસ્ટેનેબલ એનર્જી અને તમામ પ્રકારના વાતાવરણમાં ગાર્ડનનો આનંદ માણવા માટેની સુવિધાઓનો સમાવેશ થશે.
ટેન્ડર પ્રક્રિયા શરૂ
હાલ મહાનગરપાલિકા પ્રશાસને સમગ્ર મામલે અભ્યાસ કરી દરખાસ્ત અને ટેન્ડર પ્રક્રિયા શરૂ કરી છે. એકવાર આ બગીચો પૂર્ણ થઈ જશે, તે નદી કિનારાની સુંદરતામાં વધુ એક પીછા ઉમેરશે.