Petrol Diesel Prize : આંતરરાષ્ટ્રીય બજારમાં ક્રૂડ ઓઇલના ભાવમાં સતત ઘટાડો થઈ રહ્યો છે, જેના કારણે ભારતને પેટ્રોલ અને ડીઝલના ભાવમાં રાહત મળવાની શક્યતા છે. રેટિંગ એજન્સી ICRA ના તાજેતરના અહેવાલ મુજબ, જો આ વલણ ચાલુ રહેશે, તો સરકાર ચાલુ નાણાકીય વર્ષમાં ક્રૂડ ઓઇલ અને LNG (લિક્વિફાઇડ નેચરલ ગેસ) ની આયાત પર ₹1.8 લાખ કરોડ સુધીની બચત કરી શકે છે.
LNG ના ભાવમાં ઘટાડો થવાની પણ શક્યતા છે.
LNG ની લગભગ અડધી માંગ સ્થાનિક સ્તરે પૂરી થાય છે, છતાં 2024-25માં તેની આયાત પર $15.2 બિલિયન ખર્ચવામાં આવ્યા હતા. વૈશ્વિક સ્તરે પુરવઠામાં વધારો થવાની અપેક્ષા અને માંગમાં અનિશ્ચિતતાને કારણે તેના ભાવ પણ નરમ પડી શકે છે.
ક્રૂડ ઓઇલના ભાવ ચાર વર્ષના નીચલા સ્તરે
ICRAનો અંદાજ છે કે નાણાકીય વર્ષ 2025-26માં ક્રૂડ ઓઇલના સરેરાશ ભાવ $60 થી $70 પ્રતિ બેરલની વચ્ચે રહી શકે છે. આ અઠવાડિયાની શરૂઆતમાં, આંતરરાષ્ટ્રીય બજારમાં ક્રૂડ ઓઇલનો ભાવ ઘટીને $60.23 પ્રતિ બેરલ થયો, જે છેલ્લા ચાર વર્ષમાં સૌથી નીચો સ્તર છે. ભારત તેની 85% થી વધુ ક્રૂડ ઓઇલની જરૂરિયાતો આયાત દ્વારા પૂર્ણ કરે છે અને 2024-25માં તેના પર લગભગ $242.4 બિલિયન ખર્ચ કરવામાં આવ્યા હતા.
શું સામાન્ય જનતાને સીધો લાભ મળશે?
પેટ્રોલ અને ડીઝલના ભાવમાં ઘટાડો થવાની શક્યતા છે, પરંતુ સામાન્ય જનતાને કેટલો ફાયદો થશે તે હજુ નક્કી નથી. આ સંપૂર્ણપણે તેના પર નિર્ભર રહેશે કે આ બચતમાંથી કેટલી રકમ કેન્દ્ર સરકાર અને તેલ માર્કેટિંગ કંપનીઓ પોતાના માટે રાખે છે અને ગ્રાહકોને કેટલી રાહત આપે છે.