Gujarat : મુંબઈમાં ગુલાબી ઠંડીની શરૂઆત થવા લાગી છે, પરંતુ તેની સાથે વાયુ પ્રદૂષણનું જોખમ પણ વધી રહ્યું છે. નવેમ્બરના પ્રથમ અઠવાડિયામાં કમોસમી વરસાદ જોવા મળ્યો હતો, પરંતુ હવે વરસાદ સંપૂર્ણપણે થંભતા શહેરમાં સવાર-સાંજ ઠંડકનો અહેસાસ થાય છે. સવારમાં ઠંડી અને ધુમ્મસિયું વાતાવરણ હોય છે, જ્યારે બપોરના સમયે તાપમાન ફરી વધી જતાં ગરમીનો અનુભવ થાય છે. સાંજે ફરી પવનમાં ઠંડક ચડી આવે છે, પરંતુ હવામાં પ્રદૂષક તત્વો અને ધૂળ-ધુમ્મસની સંખ્યા વધતા શ્વાસ અને ફેફસાં સંબંધિત સમસ્યાઓનું જોખમ પણ વધ્યા છે.
આ વચ્ચે રાજ્યના અન્ય વિસ્તારોમાં પણ ઠંડીનું જોર વધી રહ્યું છે. મધ્ય મહારાષ્ટ્ર, મરાઠવાડા અને વિદર્ભ વિસ્તારમાં છેલ્લા 2–3 દિવસમાં તાપમાનમાં 3થી 5 ડિગ્રી સુધીનો ઘટાડો નોંધાયો છે. છત્રપતિ સંभાજીનગરમાં લઘુત્તમ તાપમાન 12.8°C, બીડમાં 11.8°C અને જલગામમાં માત્ર 10.5°C નોંધાયું છે. પર્વતીય વિસ્તારોમાં બરફવર્ષાથી ઉત્તર-પશ્ચિમ દિશામાંથી ઠંડો અને સૂકો પવન ફૂંકાઈ રહ્યો હોવાથી આગામી 6–7 દિવસ સુધી રાત્રિના તાપમાનમાં વધુ ઘટાડો થવાની હવામાન વિભાગ દ્વારા આગાહી કરવામાં આવી છે.
જોકે, મહારાષ્ટ્રના દક્ષિણ ભાગમાં તામિલનાડુ અને કેરળ તરફ હજુ પણ વરસાદની શક્યતા રહે છે. મધ્ય અને ઉત્તર ભારતના મેદાની વિસ્તારોમાં આવતા અઠવાડિયામાં ઠંડી વધુ પ્રભાવશે અને અનેક વિસ્તારોમાં સવાર-સાંજ ધુમ્મસ અને સ્મોગનું પ્રમાણ વધશે, જેનાથી પરિવહન, ખાસ કરીને સવારના ઉડાનો અને ટ્રાફિક પર અસર પડી શકે છે.
કેન્દ્રિય પ્રદૂષણ નિયંત્રણ મંડળ દ્વારા જાહેર કરાયેલા આંકડાઓ મુજબ મુંબઈનો એર ક્વોલિટી ઈન્ડેક્સ (AQI) 106થી 160 વચ્ચે નોંધાયો છે, જે ‘મધ્યમ’ શ્રેણીમાં આવે છે. છેલ્લા બે દિવસમાં એક્યુઆઈનો આંકડો 142 સુધી પહોંચતા મુંબઈ શહેર દુનિયાના સૌથી વધુ પ્રદૂષિત શહેરોમાં 9મા સ્થાન પર આવ્યું હતું. દક્ષિણ મુંબઈ અને પશ્ચિમ ઉપનગરોમાં હવાના ગુણવત્તામાં સૌથી વધુ ઘટાડો જોવા મળ્યો છે. ખાસ કરીને મુખ્ય માર્ગો, બાંધકામ સાઇટો અને વાહનવ્યવહારવાળી જગ્યાઓ આસપાસ ધૂળ અને પ્રદૂષણનું સ્તર વધુ વધી રહ્યું છે.
હવા-પ્રદૂષણ નિષ્ણાતોનું કહેવું છે કે ઠંડીના દિવસોમાં હવામાં ભેજ અને તાપમાન ઓછું રહેતાં પ્રદૂષણનું સ્તર જમીન નજીક અટકી જાય છે, જેના કારણે શ્વાસના દર્દી, બાળકો અને વૃદ્ધોને ખાસ સાવચેતી રાખવી જોઈએ. માસ્ક, સ્ટીમ ઇન્હેલેશન, પાણીનું વધારાનું સેવન અને સવારના વ્યાયામ દરમ્યાન વ્યસ્ત માર્ગોથી દૂર રહેવાની સલાહ આપવામાં આવી છે.