Gujarat : સુરત શહેરમાં સોમવારે 26 વર્ષની મહિલા BLOના શંકાસ્પદ મોતની ઘટના બહાર આવી છે. વરાછા પૂર્વ ઝોનમાં ટેક્નિકલ આસિસ્ટન્ટ તરીકે ફરજ બજાવતી અને BLO તરીકે વધારાની જવાબદારી સંભાળતી ડિન્કલ આદિત્યકુમાર ભગત પોતાના ઘરે બાથરૂમમાંથી બેભાન હાલતમાં મળી આવી હતી. તેમને હોસ્પિટલ ખસેડાયા છતાં ટૂંકી સારવાર દરમિયાન તેમનું મોત નીપજ્યું. સુરત સિવિલ હોસ્પિટલમાં કરાયેલા ફોરેન્સિક પોસ્ટમોર્ટમમાં ગીઝરમાંથી થયેલા ગેસ ગળતરના કારણે મોત થયું હોવાનું પ્રાથમિક તારણ સામે આવ્યું છે.
ઓલપાડ તાલુકાના માસમા ગામની ગૃહમ લક્ઝરીયા સોસાયટીમાં રહેતી ડિન્કલએ બે વર્ષ પહેલા પ્રેમ લગ્ન કર્યા હતા અને તેમના પતિ ખાનગી કંપનીમાં નોકરી કરે છે. ડિન્કલને છેલ્લા એક અઠવાડિયાથી શરદી-ખાંસીની તકલીફ હતી અને બે દિવસ પહેલા જ દવા પૂરી થઈ હતી. સોમવારની સવારમાં તેઓ બાથરૂમમાં ગયા બાદ લાંબા સમય સુધી બહાર ન આવતા પરિવારજનોએ દરવાજો ખોલવાનો પ્રયાસ કર્યો. પ્રતિસાદ ન મળતાં દરવાજો તોડી તેઓને બેભાન હાલતમાં બહાર કાઢી હોસ્પિટલ લઈ જવાયા, પરંતુ તેમને બચાવી શકાયા નહોતા.
ફોરેન્સિક PM કરનાર ડોક્ટરોએ જણાવ્યું છે કે પ્રાથમિક દેખાવ અને આંતરિક અવલોકનના આધારે મૃત્યુનું મુખ્ય કારણ ગીઝરના ગેસથી થયેલું ગળતર છે. જોકે, ઘટનાને ધ્યાનમાં રાખીને બ્લડ, વિસ્કેરા અને અન્ય નમૂનાઓ લઈને વિશ્લેષણ માટે મોકલવામાં આવ્યા છે જેથી ફાઈનલ રિપોર્ટમાં સંપૂર્ણ કારણ સ્પષ્ટ થઈ શકે.
રાજ્યમાં ગયા કેટલાક વર્ષોમાં BLOની કામગીરીના ભારણ અને તણાવને કારણે અનેક મોત આત્મહત્યા અને હાર્ટ અટેક જેવા કેસો સામે આવ્યા છે. ત્યારે યુવાન મહિલા કર્મચારીના અચાનક મોતે પ્રશ્નો ઊભા કર્યા છે.
પરિવારજનોના રોદનથી હોસ્પિટલ પરિસર ગમગીનીથી છલકાઈ ગયું હતું. ડિન્કલના સહકર્મચારીઓએ પણ તેમના અકાળે નિધનને દુર્ભાગ્યપૂર્ણ ગણાવ્યું છે.
વધુ તપાસ માટે સ્થાનિક પોલીસ અને ફોરેન્સિક ટીમે સ્થળની મુલાકાત લીધી છે. ગીઝર, બાથરૂમની હવા જવાની વ્યવસ્થા અને સ્થળના તાપમાન સહિતના માહોલીયા પરિબળોનું પણ નિરીક્ષણ કરાયું છે. આ તમામ વિગતોને આધારે આવતા દિવસોમાં કેસનો અંતિમ રિપોર્ટ બહાર પડશે.