નવસારી જિલ્લાના વાંસદામાં સોમવારે (20 જુલાઈ) ધોળા દિવસે આંગડિયા પેઢીમાં લાખો રૂપિયાની લૂંટની ઘટનાથી સમગ્ર પંથકમાં દહેશતનો માહોલ સર્જાયો છે. પ્રાથમિક માહિતી મુજબ, જૂની ગ્રામિણ બેંકની બાજુમાં આવેલી રમેશભાઈ અંબાલાલ આંગડિયા પેઢીને નિશાન બનાવી અજાણ્યા બંદૂકધારીઓએ આશરે ₹12 લાખથી વધુની રોકડ લૂંટી ફરાર થઈ ગયા હતા.
માહિતી અનુસાર, સાંજે આશરે 4:30 વાગ્યે સફેદ રંગની કારમાં આવેલા શખ્સો આંગડિયા પેઢીમાં ઘૂસ્યા હતા. કર્મચારીઓને ધમકાવી રોકડ કબજે કરી હતી. લૂંટને અંજામ આપ્યા બાદ આરોપીઓ સફેદ કારમાં ઝડપથી સ્થળ પરથી ફરાર થઈ ગયા હતા.
ઘટનાની જાણ થતાં જ વાંસદા પોલીસ તાત્કાલિક સ્થળ પર પહોંચી હતી. પોલીસે સમગ્ર વિસ્તારમાં નાકાબંધી કરી લૂંટમાં વપરાયેલી કારની શોધખોળ શરૂ કરી છે. ઉપરાંત, વાયરલેસ મારફતે સરહદી વિસ્તારો સહિત આસપાસના તમામ પોલીસ મથકોને એલર્ટ કરવામાં આવ્યા છે, જેથી આરોપીઓને ઝડપી શકાય.
આ ઘટના બાદ વાંસદા સહિત સમગ્ર પંથકમાં ભય અને ચિંતાનો માહોલ જોવા મળી રહ્યો છે. છેલ્લા કેટલાક સમયથી વિસ્તારમાં ચોરીના બનાવો સામે આવતા હતા, પરંતુ ધોળા દિવસે બંદૂકની અણીએ આંગડિયા પેઢીમાં લૂંટનો આ પ્રથમ બનાવ હોવાનું સ્થાનિકોમાં ચર્ચાઈ રહ્યું છે. જેના કારણે કાયદો અને વ્યવસ્થાને લઈને પણ અનેક સવાલો ઊભા થયા છે.
હાલ આ બનાવ અંગે પોલીસ દ્વારા તપાસ હાથ ધરવામાં આવી છે. સમાચાર લખાય છે ત્યાં સુધી પોલીસ મથકે સત્તાવાર રીતે ગુનો નોંધવાની કાર્યવાહી ચાલુ હતી. લૂંટારાઓની ઓળખ અને લૂંટાયેલી રકમ અંગે વધુ વિગતો પોલીસ તપાસ બાદ સામે આવે તેવી શક્યતા છે.
