Gujarat : ગુજરાતમાં શિયાળાએ હવે પોતાની હાજરી સ્પષ્ટ રીતે નોંધાવી છે અને ધીમે ધીમે ઠંડીનું જોર વધતું જોવા મળી રહ્યું છે. હવામાન વિભાગના તાજા આંકડા મુજબ રાજ્યમાં આ સિઝનની સૌથી વધુ ઠંડી દાહોદ જિલ્લામાં નોંધાઈ છે, જ્યાં લઘુત્તમ તાપમાન 11 ડિગ્રી સેલ્સિયસ સુધી ગગડી ગયું છે. રાજ્યમાં અન્ય વિસ્તારોમાં પણ ઠંડીનો ચમકારો વધી રહ્યો છે. ખાસ કરીને ડાંગ અને અમરેલી જિલ્લાઓમાં તાપમાન 13 ડિગ્રી સુધી નોંધાતા, આ વિસ્તારો પરંપરાગત રૂપે સૌથી ઠંડું ગણાતા નલિયા કરતાં પણ વધુ ઠંડા રહ્યા છે. સમગ્ર રાજ્યમાં હવે રાત્રિના સમયે ઠંડી અસર વર્તાઈ રહી છે, જ્યારે બપોરે હળવી ગરમાવો અનુભવાઈ રહ્યો છે.
રાજ્યના હવામાન નિષ્ણાતોનું કહેવું છે કે ડિસેમ્બર મહિનાના પ્રારંભમાં શિયાળો સામાન્ય કરતાં વધુ ઠંડો રહેવાની સંભાવના છે. દાહોદમાં પારો 11 ડિગ્રી સુધી ઉતરતા લોકો ઠુંઠવાઈ જવાના હાલાત બન્યા છે. બજારોમાં શિયાળું વસ્ત્રો ખરીદનારાઓની સંખ્યા વધી રહી છે અને ગ્રામ વિસ્તારોમાં સાંજ પડતાં જ લોકો અગાશીમાં અગ્નિ પ્રગટાવીને ગરમાવો મેળવતા જોવા મળી રહ્યા છે. આમ, ગુજરાતમાં શિયાળાની સિઝન હવે વાસ્તવમાં શરૂ થઈ ગઈ છે અને આગામી દિવસોમાં ઠંડીનો ચમકારો વધુ તીવ્ર રહેવાની શક્યતા જણાઈ રહી છે.
હવામાન વિભાગ મુજબ રાજ્યમાં આગામી દિવસોમાં વાતાવરણ સૂકું રહેશે. દિવસ દરમિયાન મહત્તમ તાપમાન 30 થી 32 ડિગ્રી વચ્ચે રહેશે, જ્યારે લઘુત્તમ તાપમાન 15 ડિગ્રી આસપાસ રહી શકે છે. ઉત્તર-પૂર્વ દિશાથી આવતા પવનના કારણે તાપમાનમાં થોડો ફેરફાર થાય છે, પરંતુ આગામી સપ્તાહથી ઠંડીનું જોર વધુ વધવાની આશા છે. ખાસ કરીને રાત્રિ અને વહેલી સવારે કડકડતી ઠંડીની શરૂઆત થશે અને શિયાળો વધુ જામી જશે. ઘણા વિસ્તારોમાં વહેલી સવારે ધૂમ્મસ રહેવાની શક્યતા છે, જેના કારણે વાહનચાલકો અને કામે જતાં લોકોને વધારાની સાવચેતી રાખવાની સલાહ આપવામાં આવી છે.