Gujarat : કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી ગુરૂવારે સુરત પહોંચ્યા અને અહીંથી દક્ષિણ ગુજરાતના મહત્ત્વપૂર્ણ રોડ પ્રોજેક્ટ્સનું સઘન નિરીક્ષણ શરૂ કર્યું. સુરત એરપોર્ટ પર આગમન થયા બાદ તેમણે કોઈ વિલંબ કર્યા વગર બાય રોડ પ્રવાસ શરૂ કર્યો અને ત્યારબાદ દિલ્હી–મુંબઈ એક્સપ્રેસ વે સહિત કુલ 300 કિમીથી વધુ રાષ્ટ્રીય ધોરીમાર્ગોની પ્રગતિની સમીક્ષા માટે નીકળી ગયા. આ પ્રવાસ દરમિયાન તેઓ જમીન પરથી તેમજ હેલિકોપ્ટર દ્વારા એરિયલ સર્વે કરીને પ્રોજેક્ટ્સની વાસ્તવિક સ્થિતિની તપાસ કરશે.
દક્ષિણ ગુજરાતમાં ચાલતા રોડ પ્રોજેક્ટ્સ, ખાસ કરીને NH-53, NH-48 અને દિલ્હી–મુંબઈ એક્સપ્રેસ વે, દેશના મહત્વપૂર્ણ પરિવહન નેટવર્કનો ભાગ છે. ગડકરી આ તમામ પ્રોજેક્ટ્સની કામગીરીનું મૂલ્યાંકન કરશે અને રોડ બાંધકામ દરમ્યાન ઉભી થતી વિવિધ ટેક્નિકલ અને સ્થાનિક સમસ્યાઓનો સ્થળ પર જ ઉકેલ લાવવાનો પ્રયાસ કરશે. એરિયલ સર્વે દરમિયાન તેઓ એક્સપ્રેસ વેના લગભગ 200 કિમી વિસ્તારનું નિરીક્ષણ કરશે, જ્યારે અન્ય હાઈવેના લગભગ 100 કિમી રોડની ગુણવત્તા પણ તપાસી રહ્યા છે.
NH-48ને એક્સપ્રેસ વે સાથે જોડતા ઇન્ટરચેન્જની ડિઝાઇન અંગે સપાટો ઉઠી રહ્યો છે, જેના કારણે ભવિષ્યમાં ગંભીર ટ્રાફિક સમસ્યાઓ ઊભી થઈ શકે છે. સ્થાનિક વપરાશકર્તા અને નિષ્ણાતોએ આ બાબતને લઈને મંત્રીના પ્રવાસમાંથી મોટા સુધારાની અપેક્ષા વ્યક્ત કરી છે. ગડકરીએ સ્પષ્ટ કર્યું છે કે તેમની મુલાકાતનો હેતુ માત્ર પ્રગતિની સમીક્ષા કરવાનો નહીં, પરંતુ વાસ્તવિક સમસ્યાઓને સમજવાનો અને તેનું તાત્કાલિક નિરાકરણ લાવવાનો છે.
મંત્રાલયના આ પ્રવાસને કારણે દક્ષિણ ગુજરાતમાં રોડ ઇન્ફ્રાસ્ટ્રક્ચરની ગુણવત્તા અને ગતિ બંનેમાં સુધારો થવાની આશા છે. ખાસ કરીને સુરત–વાપી–બિલીમોરા–નવસારી પસાર થતો રાષ્ટ્રીય માર્ગ તથા એક્સપ્રેસ વેની ઝડપથી આગળ વધતી કામગીરી ભવિષ્યમાં પરિવહન વ્યવસ્થાને વધુ મજબૂત બનાવશે.
સુરત એરપોર્ટથી નીકળ્યા બાદ ગડકરી એક વિશેષ નિરીક્ષણ બસમાં બેસીને હાઈવેની સ્થિતિનું વ્યક્તિગત નિરીક્ષણ શરૂ કર્યું. આ બસમાં NHAIના ઉચ્ચ અધિકારીઓ, પ્રોજેક્ટ ડિરેક્ટર્સ અને ટેક્નિકલ નિષ્ણાતો પણ જોડાયા હતા. ગડકરી રોડની સપાટી, બાંધકામની મજબૂતાઈ, ટ્રાફિકના પ્રવાહ અને મુસાફરોને થતી મુશ્કેલીઓનુંમૂલ્યાંકન કરી રહ્યા છે. તેઓ બસમાંથી ઉતરીને વિવિધ પોઈન્ટ પર રોડનું સીધું નિરીક્ષણ પણ કરી રહ્યા છે અને અધિકારીઓને જરૂરી સુધારાઓ માટે તાત્કાલિક સૂચનાઓ આપી રહ્યાં છે.