Gujarat : વલસાડ જિલ્લાના ખેડૂતો માટે મોટી રાહત સામે આવી છે. જિલ્લામાં નવરાત્રી બાદ અચાનક પડેલા વરસાદ અને જોરદાર પવનના કારણે થતા ડાંગરના પાકના 71.74 કરોડ રૂપિયાના નુકસાન માટે રાજ્ય અને કેન્દ્ર સરકાર દ્વારા સહાય મંજૂર કરવામાં આવી છે. આ સહાયનો સીધો લાભ કુલ 40,950 ખેડૂતોને મળશે. સરકાર દ્વારા મંજૂર થયેલી રકમમાંથી પ્રથમ તબક્કાના 3 કરોડ રૂપિયા ફાળવાઈ ચૂક્યા છે અને ખેડૂતોના ખાતામાં જમા થવાની પ્રક્રિયા શરૂ થઈ ગઈ છે.
નવરાત્રી બાદ આવેલા અસામાન્ય આબોહવા પરિવર્તનથી વલસાડ જિલ્લામાં ડાંગરના પાકને ગંભીર નુકસાન થયું હતું. જિલ્લામાં કુલ 75 હજાર હેક્ટર વિસ્તારમાં ડાંગરની વાવણી થઈ હતી, જેમાંથી 73 હજાર હેક્ટર વિસ્તારમાં પાકને મોટા પાયે અસર પહોંચી હતી. ખેડૂતોની રજૂઆત બાદ જિલ્લા કલેક્ટરે રાજ્ય સરકાર સમક્ષ રૂ.72 કરોડની સહાયની માગણી મોકલેલી, જેને ધ્યાનમાં લઈ રાજ્ય અને કેન્દ્ર સરકાર દ્વારા કુલ રૂ.71.74 કરોડની સહાયને મંજૂરી અપાઈ છે.
ખેતીવાડી વિભાગે નુકસાનગ્રસ્ત વિસ્તારોનો સર્વે ઝડપી ગતિએ પૂર્ણ કર્યો હતો. માત્ર 7 દિવસમાં 37 હજાર હેક્ટરનું સર્વેક્ષણ પૂર્ણ કરવામાં આવ્યું. ખેડૂતોએ ‘આઈ ખેડૂત પોર્ટલ’ પર પોતાની અરજીઓ સાથે ખેતરમાં થયેલી નુકસાનીના ફોટોગ્રાફ્સ અપલોડ કર્યા હતા. અત્યાર સુધીમાં 25 હજારથી વધુ અરજીઓ મંજૂરી માટે મોકલાઈ છે, જ્યારે બાકીની અરજીઓની પ્રક્રિયા ચાલુ છે.
વલસાડ, પારડી, કપરાડા, ઉમરગામ અને વાપી તાલુકાના ખેડૂતોને મોટું નુકસાન થતાં સંસદસભ્ય ધવલ પટેલ સહિત તમામ ધારાસભ્યોએ મુખ્યમંત્રી સમક્ષ વળતર માટે રજૂઆત કરી હતી. રાજ્ય સરકારે ગુજરાતમાં પાકને થયેલી કુલ રૂ.10 હજાર કરોડની નુકસાની માટે સિદ્ધાંતિક મંજૂરી આપી છે. હાલમાં સેટેલાઇટ સર્વે દ્વારા વાસ્તવિક નુકસાનીની ચકાસણી ચાલી રહી છે અને આગામી દિવસોમાં પાત્ર ખેડૂતોના બેંક ખાતામાં સહાયની રકમ જમા થશે.