Gujarat : વડોદરાના સાંસદ ડૉ. હેમાંગ જોશીએ લોકસભાના વિપક્ષ નેતા રાહુલ ગાંધીને રાષ્ટ્રીય એકતા પદયાત્રા યુનિટી માર્ચમાં જોડાવા માટે ખુલ્લું પત્ર લખતાં રાજકીય ચર્ચાઓ ગરમાઈ ગઈ છે. સરદાર વલ્લભભાઈ પટેલની 150મી જન્મજયંતિ નિમિત્તે કરમસદથી સ્ટેચ્યુ ઓફ યુનિટી સુધી નીકળેલી યાત્રામાં ભાગ લેવા માટે રાહુલ ગાંધીને આમંત્રણ અપાતાં, ભાજપ અને કોંગ્રેસ વચ્ચે નવા રાજકીય સંદેશો, પ્રતિક્રિયા અને ટકોરો તેજ બન્યા છે. જોશીએ જણાવ્યું કે જો રાહુલ ગાંધી આ પદયાત્રામાં જોડાશે તો “કોંગ્રેસ ગુંગળામણમાંથી બહાર આવી શકશે,” એવા નિવેદનથી રાજ્યના રાજકારણમાં નવી ચર્ચાઓ ઊભી થઈ છે.
ડૉ. હેમાંગ જોશીએ જણાવ્યું કે આ રાષ્ટ્રીય એકતા પદયાત્રા કોઈ રાજકીય પક્ષ પ્રેરિત પહેલ નથી, પરંતુ દેશને એકતા અને સમરસતાનો સંદેશ આપવા રચાયેલ યાત્રા છે. કરમસદથી કેવડિયા સુધી 150 યુવાનો ચાલીને રાષ્ટ્રીય એકતા અને સરદાર પટેલના સંદેશને જનજન સુધી પહોંચાડશે. આ યાત્રાનું ફ્લૅગ-ઓફ પ્રધાનમંત્રી નરેન્દ્ર મોદી વર્ચ્યુઅલી કરશે, જ્યારે રાજ્યના મુખ્યમંત્રી પણ જોડાવાના છે. સાંસદે જણાવ્યું કે સામાજિક, શૈક્ષણિક અને ધાર્મિક સંસ્થાઓને પણ આ યાત્રામાં જોડાવા આમંત્રણ આપવામાં આવ્યું છે.
રાહુલ ગાંધીને લખાયેલા પત્રમાં સાંસદે સ્પષ્ટ કર્યું છે કે તેઓને આ યાત્રામાં એક પ્રતિપક્ષ નેતા તરીકે નહીં પણ એક ભારતીય નાગરિક તરીકે જોડાવાનું આમંત્રણ આપવામાં આવ્યું છે. “ભારત જોડો” જેવી અનેક યાત્રાઓ કરનાર રાહુલ ગાંધીને રાષ્ટ્રીય એકતા પદયાત્રામાં ચાલવા વિનંતી કરતાં જોશીએ જણાવ્યું કે “આ BJPની યાત્રા નથી, રાષ્ટ્રીય યાત્રા છે. જો તેઓ જોડાય તો દેશ માટે સકારાત્મક સંદેશ જશે.”
જોશીએ વધુમાં ટકોર કરતાં જણાવ્યું કે કોંગ્રેસને વર્ષોથી સરદાર પટેલને મળવું જોઈએ તેવું સન્માન મળતું નથી. “કોંગ્રેસના કાર્યકર્તાઓ જાણે ગુંગળામણમાં રહે છે. જો રાહુલ ગાંધી પોતાના પગથી ચાલીને આ યાત્રામાં જોડાશે તો ચોક્કસ કોંગ્રેસ પાર્ટી માટે આ મોટો સંદેશ બનશે.” તેમણે ઉમેર્યું કે આ યાત્રામાં દેશના તમામ સાંસદો અને ધારાસભ્યોને આમંત્રણ પાઠવાયું છે અને લોકશાહીના મૂલ્યોને નજીકથી સમજવાનો અવસર પણ મળશે.
આ આમંત્રણ પછી રાજ્ય અને રાષ્ટ્રીય સ્તરે રાજકીય હલચલ વધી ગઈ છે. હવે નજર છે કે રાહુલ ગાંધી આ યુનિટી માર્ચમાં જોડાય છે કે નહીં, અને તેમની સંભાવિત હાજરી રાજકીય સમીકરણોમાં શું ફેરફાર લાવશે.