Gujarat : સુરત શહેરની BRTS બસોમાં મુસાફરોની ભીડનો ફાયદો ઉઠાવી પર્સ ચોરી કરતી ટોળકીનો ભાંડાફોડ ઉધના પોલીસે કર્યો છે. પોલીસે સર્વેલન્સ ટીમની મદદથી ત્રણ સક્રિય આરોપીઓને ઝડપી પાડી તેમના પાસેથી ₹14,500 રોકડ રકમ પણ કબજે કરી છે.
ફરિયાદ બાદ પોલીસે તાત્કાલિક CCTV ફૂટેજ ચકાસ્યા, જેમાં ત્રણ શખ્સો ભીડમાં સંકોચી સંકોચીને એક મુસાફરનો પર્સ ઉચકતા કેદ થયા હતા. ફૂટેજના આધારે પોલીસે સર્વેલન્સ નેટવર્ક મારફતે તેમની હિલચાલ ટ્રેક કરી અને બાતમીદારોની મદદથી ત્રણેયને પકડી પાડ્યા.
ઉધના પોલીસની ઝડપી કાર્યવાહી.
પોલીસે પકડેલા આરોપીઓના નામ છે:
યશ ઉર્ફે કાળીયા અજયભાઈ રાજપુત (26) — ધંધો: બેકાર
મોહસીન ઉર્ફે માયા રિઝવાન શેખ (24) — ધંધો: છૂટક મજૂરી
જીજ્ઞેશ ઉર્ફે જીગો ઉર્ફે લંગડો દિપકભાઈ પટેલ (18) — ધંધો: બેકાર
આ ત્રણેય સામે ઉધના પોલીસ સ્ટેશનમાં ગુનો દાખલ કરવામાં આવ્યો છે અને હાલ વધુ તપાસ ચાલી રહી છે.
CCTVમાં કેદ થઈ ચોરીની ગતિવિધિ.
25 સપ્ટેમ્બર 2025ની સાંજે 7 વાગ્યાની આસપાસ ખરવરનગર BRTS બસ સ્ટેશન નજીક એક મુસાફરનું પર્સ ચોરી ગયું હતું. પીડિત મુસાફરે જણાવ્યું કે પર્સમાં ₹32,000 રોકડ, આધાર કાર્ડ, ડ્રાઇવિંગ લાયસન્સ, ATM કાર્ડ અને ક્લબ મેમ્બરશીપ કાર્ડ જેવા મહત્વના દસ્તાવેજો હતા.
મુખ્ય આરોપી સામે 15થી વધુ ગુનાઓ નોંધાયેલા.
મુખ્ય આરોપી યશ ઉર્ફે કાળીયા રાજપુતનો ગુનાહિત ઈતિહાસ લાંબો છે. તે સામે ખટોદરા, અઠવાલાઇન્સ, સલાબતપુરા, ઉધના અને રેલવે પોલીસ સ્ટેશનોમાં કુલ 15 જેટલા ગુનાઓ — ચોરી (કલમ 379), હુમલો (307), મારામારી અને પ્રોહિબિશન એક્ટ હેઠળ નોંધાયેલા છે.
સાથે જ મોહસીન ઉર્ફે માયા શેખ સામે પણ મારામારીના ગુનાઓ નોંધાયેલા છે.
પોલીસની અપીલ
પોલીસે શહેરના લોકોને અપીલ કરી છે કે મુસાફરી દરમિયાન ખાસ કરીને ભીડભરેલી બસો અથવા જાહેર સ્થળોએ પોતાના પર્સ, મોબાઈલ અને કિંમતી સામાન પર ખાસ નજર રાખે. તાજેતરમાં શહેરમાં આવી ચોરીની ઘટનાઓમાં વધારો જોવા મળ્યો હોવાથી પોલીસ સતત CCTV સર્વેલન્સ અને મોબાઇલ પેટ્રોલિંગ વધારી રહી છે.